200-meter suspension bridge sa Atabay Peak gisugyot

CEBU, Philippines —  Gisugyot sa lokal nga pangagamhanan sa lungsod sa Tuburan, Cebu, ang pagtukod og 200-metros nga suspension bridge sa Atabay Peak sa Barangay Marmol aron mapalambo ang mountain tourism sa lungsod.

Matud ni Tourism Infrastructure and Enterprise Zone Authority (TIEZA) Chief Operating Officer Mark Lapid, lakip kini sa mga pasilidad nga gikonsiderar sa ahensya alang sa pagpalambo base sa proposal sa lokal nga kagamhanan.

Suma pa ni kanhi Tuburan Mayor Aljun Diamante, sumpayon sa suspension bridge ang Atabay Peak ngadto sa laing rock formation. Magtukod usab og mga hagdanan aron mas sayon nga maabot sa mga bisita ang maong lugar nga naghatag og 360-degree panoramic view sa kabukiran.

Giduaw usab nila ang Tuburan 360 eco-tourism destination sa Barangay Kabangkalan, nga nahimutang kapin 340 metros ibabaw sa lebel sa dagat.

Atol sa pagbisita niadtong Huwebes, nangtanom sila og kawayan ug kape sa Bamboo Village ug Tuburan Coffee Farm isip kabahin sa pagsaulog sa National Environmental Awareness Month.

Gipangunahan usab ni Mayor Christian Daniel Diamante, Vice Mayor Danilo Diamante ug ubang opisyal sa lungsod ang groundbreaking sa Tuburan Heroes Park.

Samtang, nagpahigayon ang Lingkod Lapid og medical ug social mission sa Barangay San Nicolas Proper sa Cebu City niadtong Sabado, diin naghatag og libreng medical checkup, dental services, eye examination, tambal ug uban pang serbisyo. Gipahigayon usab ang mini-show nga “Handog Saya” sa Tuburan ug Cebu Normal University (CNU) sa Cebu City.   

Sa kalihokan sa CNU niadtong Biyernes, gipahibalo ni Lapid ug university president Dr. Laurence Garcia nga 300 ka estudyante ang gikonsiderar alang sa scholarship ubos sa Tulong Dunong program. (BANAT NEWS)