Ebidensya sa 3 artikulo vs Sara, iti-turnover sa Ombudsman

MANILA, Philippines — Iti-turnover ng prose­cution panel sa Office of the Ombudsman ang mga ebidensyang naiprisinta laban kay Vice President Sara Duterte sa Senate impeachment court upang magamit sa pagpapatuloy ng mga imbestigasyong may kaugnayan sa posibleng pananagutang kriminal.

Ayon kay House prosecutor Joel Chua, kabilang sa mga rekord na isusumite ang mga ebidensya para sa Article I na tumatalakay sa confidential funds, Article III na may kaugnayan sa bribery, at Article IV na grave threats. Ang mga ito ay kabilang sa mga artikulong inalis na sa pagdinig ng Senate impeachment court.

Sinabi ni Chua na susunod sila sa panawagan ni Ombudsman Jesus Crispin Remulla na isumite ang mga dokumento at rekord kaugnay ng kwestiyonableng paggamit umano ng confidential funds ng Bise Presidente.

Samantala, nais umano ng Ombudsman na lalong palalimin ang imbestigasyon matapos ibasura ng Commission on Audit (COA) ang motion for reconsideration ng kampo ni Duterte sa P73.287 milyong disallowed confidential expenses noong Disyembre 2022 na ipinag-utos na isauli.

Sa ruling ng COA, binanggit ang kakulangan umano ng mga resibo at iba pang dokumento para sa naturang mga gastusin. Inimbestigahan din si Duterte kaugnay ng umano’y hindi wastong paggamit ng P612.5 milyong confidential funds ng Office of the Vice President at Department of Education.

Binigyang-diin ni Chua na ang pagbawi sa usapin ng confidential funds sa impeachment trial ay hindi nanga­nga­hulugang ititigil na ang paghahabol sa mga alegasyon ng maling paggamit ng pondo ng bayan at iba pang kaugnay na kaso.