2-anyos namatay, ama-ama suspek

CEBU, Philippines — Suspek sa kamatayon sa dos-anyos nga bata nadakpan sa kapolisan sa Barangay Buhisan sa Dakbayan sa Sugbu pipila ka oras human sa insidente niadtong Miyerkules sa gabii.

Ang 37-anyos nga lalaki nga giila lang nga si Lyle gipasanginlan sa kapuyo niini nga maoy nakaingon sa kamatayon sa iyang 2-anyos nga anak diha sa ilang panimalay sa barangayTisa.

Sumala sa Labangon Police Station, nadakpan ang suspek niadtong Septiyembre 16, mga alas 9:45 sa gabii human sa gipahigayong operasyon sa kapulisan.

Matud sa suspek, wala kuno niya tuyoa ang nahitabo. Ang iyang pangangkon, nga iyaha untang gitangtang ang nabara nga sip-on sa ilong sa bata.

Apan gikatahong kalit nga wala na motingog ang bata ug naay nigawas nga pula nga likido gikan sa baba niini. Human niini, giingong milakaw ang suspek.

Apan sa pamahayag sa inahan sa biktima nga gipatik niini sa social media, giingong dali nga mibiya ang suspek human sa insidente.

Matud pa niya, wala man unta sila nagkasumpaki sa wala pa siya moadto sa trabaho ug wala siya masayod sa hinungdan nganong nahitabo to.

Tungod pud sa iyahang post sa social media, naay nakatug-an sa mga polis kun diin nagtago ang suspek anang mga orasa hinungdan nga dali kining nadakpan sa mga polis.

Matud ni Police Captain Meryl Causin, OIC sa Labangon Police Station 10, ang inisyal nga resulta sa eksaminasyon nagpakita nga ang hinungdan sa kamatayon mao ang subdural hemorrhage tungod sa traumatic head injury.

Nagpaabot pa ang kapulisan sa opisyal nga resulta sa autopsy aron makompleto ang imbestigasyon.

Nagpadayon ang imbestigasyon sa mga awtoridad samtang giandam na sa kapolisan ang posibleng kasong ipasaka nila batok sa suspek. (BANAT NEWS)