680 ka malapason nasikop atol sa SCI

CEBU, Philippines —  Gipangusgan sa Cebu Police Provincial Office (CPPO) ang ilang operasyon kontra sa mga malapason sa nasudnong mga balaod ug ordinansa sa kalungsoran sa tibuok probinsya niadtong Septiyembre 11 ubos sa Safer Cities Initiative.

Niabot og 680 ka tawo ang nadakpan sa kapin 300 ka mga gilusad nga operasyon sa nagkadaiyang police stations sa probinsya anang adlawa.

Kabahin ang mga operasyon sa Anti-Criminality Plan nga gipatuman sa kapolisan aron mapadayon ang kalinaw ug kahapsay sa mga komunidad.

Sa 680 ka nasikop, 435 ang gipamulta samtang 245 ang gipasidan-an ug gibuhian. Mikabat sa P264,400 ang nakolektang multa, samtang walay naitalang nasikop nga ubos sa “charged” ug “others” nga disposisyon.

Pinakadaghan sa mga paglapas ang may kalabotan sa city ug municipal traffic ordinances nga mikabat og 435 ka kaso.

Nasikop usab ang 65 ka menor de edad tungod sa paglapas sa curfew, 79 tungod sa pag-inom og alkohol sa pampublikong lugar ug 53 tungod sa pagpanigarilyo sa pampublikong lugar.

Laing 34 ang nasikop tungod sa paglaag sa kadalanan nga walay sinina sa ibabaw sa lawas, samtang siyam ang nasikop tungod sa paggamit og karaoke lapas sa gitakdang oras.

Duha usab ang nasikop tungod sa paglapas nga may kalabotan sa pagsul-ob og balaclava, samtang tulo ang nasikop tungod sa ubang paglapas sa lokal nga ordinansa.

Sa mga component city, nanguna ang Carcar nga adunay 112 ka nasikop, gisundan sa Toledo nga adunay 100, Bogo 75, Naga 52, Talisay 48 ug Danao 19.

Sa Class A municipalities, 31 ang nasikop sa Balamban, gisundan sa Daangbantayan nga adunay 22, Liloan 17 ug Minglanilla 10. Sa Class B municipalities, nakarekord ang Dumanjug og 20 ka nasikop samtang 13 ang nasikop sa Medellin.

Matud ni Cebu PPO Provincial Director Police Colonel Abubakar Udang Mangelen Jr., ang padayong pagpatuman sa Safer Cities Initiative nagtumong sa pagmintinar sa kalinaw ug kahapsay pinaagi sa makanunayon nga presensya sa kapolisan ug pakig-alayon sa komunidad.

Dili lang daw matud ang gidaghanon sa mga nasikop ang tumong sa operasyon kondili ang pagsulbad usab sa mga paglapas nga mahimong makaapekto sa kaluwasan sa publiko ug kahapsay sa paggamit sa mga pampublikong lugar.

Matud sa CPPO, apil usab sa Safer Cities Initiative ang preventive patrols, community engagement ug koordinasyon sa mga local government unit, gawas sa pagpatuman sa lokal nga mga ordinansa.

Gidasig sa kapolisan ang publiko nga motuman sa mga lokal nga ordinansa, samtang gipasiugda nga importante ang kooperasyon sa mga residente aron mapadayon ang malinawon, luwas ug hapsay nga mga komunidad.(BANAT NEWS)