Handog Pangulo Caravan sa Capitol Grounds

CEBU, Philippines —  Gipaabot nga liboan ka mga Sugbuanon ang makabenepisyo sa nagkadaiyang libre nga serbisyo, ayuda, trabaho ug skills training atol sa “Handog ng Pangulo, Serbisyong Sapat Para sa Lahat” service caravan sa Cebu Provincial Capitol karong Lunes, Sept. 14, 2026.

Ang kalihokan maghiusa sa nagkadaiyang national government agencies ug mga opisina sa Cebu Provincial Capitol aron mas mapaduol sa katawhan ang mga serbisyo sa gobyerno.

Lakip sa mga serbisyo nga i-offer mao ang healthcare, financial assistance, livelihood support, skills training, employment ug regulatory services.

Ang service caravan ipahigayon tibuok adlaw sulod sa Cebu Provincial Capitol compound, nga magsilbing one-stop venue alang sa mga Sugbuanon nga nanginahanglan og tabang gikan sa nagkadaiyang ahensya sa gobiyerno. Gi-organisar kini matag tuig sa Office of the President isip kabahin sa pagsaulog sa birthday ni President Ferdinand “Bongbong” Marcos Jr.

Lakip sa programa ang ceremonial distribution sa mga ayuda ug interaksyon uban sa Presidente pinaagi sa Zoom.

Magbutang usab og assistance desks ang Department of Justice, Department of Migrant Workers, Philippine Statistics Authority, PhilHealth ug Technical Education and Skills Development Authority sa Social Hall.

Ubos sa social welfare assistance, lima ka beneficiaries ang makadawat og slots sa UPLIFT Program sa Department of Social Welfare and Development, lima usab sa Sustainable Livelihood Program ug lima ka DARE Care slots, 15 ka TESDA scholarship slots ug 40 ka financial assistance slots gikan sa Commission on Higher Education ang ipanghatag.

Adunay usab employment assistance sama sa Special Program for the Employment of Students, Government Internship Program, DOLE-DILP ug TUPAD.

Sa health assistance, 30 ka mobility aids gikan sa Department of Health ang ipanghatag, lima ka PWDs ang makadawat og PWD identification cards gikan sa National Council on Disability Affairs.

Apil usab sa programa ang housing, agriculture ug small business assistance. Ang National Housing Authority mag-apod-apod og assistance ngadto sa 12 ka EHAP beneficiaries, samtang ang National Irrigation Administration mag-turn over og duha ka solar-powered irrigation projects.

Ang Department of Trade and Industry ug Small Business Corp. mag-award usab og lima ka certificates of loan approval ngadto sa mga kwalipikadong benepisyaryo.

Gawas sa ceremonial activities, mag-operate ang nagkadaiyang government service stations sa tibuok Capitol compound. Maghimo ang TESDA og product ug skills showcases sa Capitol Dome, samtang ang DSWD mag-apod-apod sa UPLIFT assistance sa Parking Lot 1.

Maghatag og medical checkups ang DOH, samtang ang Department of Agriculture ug DTI magpakita og mga produkto ubay sa Capitol facade.

Sa Capitol Basketball Court, magpahigayon ang DOLE og local ug overseas job fair, kauban ang medical checkups ug pag-apod-apod sa PWD identification cards.

Apil usab sa mga partisipanteng ahensya ang Bureau of Fire Protection, Integrated Bar of the Philippines-Cebu Chapter, Public Attorney’s Office, NHA 7, PhilPost ug nagkadaiyang service offices sa Cebu Provincial Capitol.

Tumong sa maong service caravan nga mapaduol sa mga Sugbuanon ang nagkadaiyang programa sa gobyerno ug hatagan sila og kahigayonan nga maka-access sa daghang serbisyo sa usa ka lugar atol sa Sept. 14 nga kalihokan. (BANAT NEWS)