Welder nakuryente habang may kinukumpuni, tepok
MANILA, Philippines — Patay ang isang welder na diumano’y nakuryente habang tinatapos ang kaniyang trabaho, sa Teresa, Rizal, noong Sabado ng tanghali.
Idineklarang dead-on-arrival sa ospital ang biktimang kinilalang si Alexander Bacus Libunfacil Jr.
Sa ulat ng Teresa Municipal Police Station, inireport ng isang Glenda Aragon, kaibigan ng biktima, ang insidente na naging dahilan ng pagkasawi ng biktima.
Dakong alas-12:00 ng tanghali ng Mayo 11, sa Sitio Canlibot, Brgy. Bagumbayan, Teresa, Rizal, nang maganap ang insidente.
Sa naging salaysay sa pulisya ng katrabaho na si Paul Gripo, niyaya niya ang biktima na mananghalian na sila subalit hindi pa umano iniwan ang ginagawa ng huli, sa pagsasabing “Mauna na kayo tatapusin ko lang yung ginagawa ko, susunod na ako agad”.
Nauna nang kumain si Gripo at iba pang kasabay kumain at nang matapos ay pinuntahan ang biktima na ikinagulat nila.
Walang malay ang biktima habang may nakapulupot sa katawan na kawad ng kuryente kaya agad na pinatay ni Gripo ang power ng welding machine at isinugod ang biktima sa pinakamalapit na pagamutan subalit bigo nang umabot ng buhay.
- Latest