One More Chance 2 sunod bulan

CEBU, Philippines – Karong Nobyembre na mulugwa sa mga sinehan lukop nasud ang gipaabot ug gikahinaman na sa mga fans nga sequel sa pelikulang “One More Chance”  nila ni John Lloyd Cruz ug Bea Alonzo ubos sa Star Cinema. Suma pa sa director nga si Cathy Garcia-Molina, gipaningkamutan nila nga  matupngan kun dili man gani malabwan ang unang pelikula niadtong 2007. Gibutyag niya nga mas lawom na karon ang istorya sa sequel ug dili lamang puros “kilig”.

Mudistansya kang Alden

Naglikay si Sam Pinto nga malambigit ang iyang ngalan kang Alden Richards karong panahona kay nahadlok siya nga pasanginlan nga nagsakay-sakay sa kasikat sa nahisgutan ug awayon siya sa minilyong  fans  niini.  Giklaro niya nga wala pormal nga nanguyab niya si  Alden  kaniadto.

Utang kabubut-on

Subling nagpasalamat si Governor Vilma Santos ngadto sa mga tawo nga nisalig ug kumbinsido nga haom siya nga mamahimong bise president sa nasud. Apan niya pa, ang Batangas gyud maoy iyang serbisyohan, ilabi na ang Lipa City nga maoy unang nipili niya aron mamahimong labing unang babaye nga mayor sa maong dapit.

Buot usab niya nga muserbisyo sa Batanguenos nga nisalig niya sa 18 ka tuig, busa mulansar siya pagkakongresista sunod tuig.

Nakasabot sa management

Giklaro ni Elmo Magalona nga wala siya nangluod sa GMA Network nga nihukom nga buk-on ang ilang love team ni Janine Gutierrez kinsa gipares nakaron ngadto kang Aljur Abrenica ug  Mark Herrassa bag-ong programa nga “Dangwa”. Suma pa ni Elmo, normal ra ang maong hukom sa ilang trabaho. Si Elmo bag-o lang ni pirma og  kontrata ubos sa Universal Records. Sila ni Janine ang uyab gyud sa tinuod nga kinabuhi.

Kalma lang

Gipakalma ni Judy Ann Santos ang iyang mga  fans ug higala nga nabalaka para niya human siya nag-upload og hulagway nga nag-headstand siya.  Suma pa ni Juday nga normal ra matud pa sa us a ka mabdos ang  mag-headstand, makatabang matud pa kini ilabi na kun suhi ang bata nga gisabak. Apan kinahanglan matud pa nga adunay professional o instructor gyud nga mugiya. Nagpasalamat hinuon siya sa tanan nga naghunahuna lamang sa iyang kaayohan.

Jolina nitagam gyud?

No comment na si Jolina Magdangal sa pangutana sa press kung andam na ba kini nga makatrabaho pag-usab si Claudine Barreto karon nga aktibo na ang nauwahi sa showbiz. Kahinumduman nga nipadayag si Jolina niadtong Hulyo nga nadismaya siya kang Claudine dihang nahuman dayon ang ilang teleserye sa GMA7 niadtong 2011, ang Iglot. Dihang gipangutana kun okay na ba siya nga magkatrabaho sila ni Claudine,  ilabi na managsama na silang anaa sa ABS-CBN, nagdumili na pagtubag si Jolina. Igo lamang kining niingon nga, “happy ako for her.”

Happy para  kang Beauty

Walay isyu kang  Max Eigenmann ang pagsabak karon ni Beauty Gonzales. Suma pa niya, happy siya para kang Beauty nga gihulagway niya nga buotan, ug sa amahan sa gisabak niini nga si Norman Crisologo.  Nasayran nga si Norman ex-boyfriend ni Max ug aduna silay usa ka anak. Si Max anak ni kanhi Mark Gil ug igsuon ni Sid Lucero.  Ang aktres nga si Bing Pimentel ang ilang inahan.

Dili mag-artista

Walay plano si  Miss Grand International 3rd runner-up Parul Shah nga mag-artista.  Human matud pa sa iyang mga kabilinggan sa maong pageant ug sa Bb. Pilipinas Charities Inc., ipadayon niya ang iyang propesyon isip nurse.  Buot ni Parul nga mamahimong  flight nurse.

Dindi maoy Imelda Marcos

Balik acting ang kanhi beauty queen nga si Dindi Gallardo human sa 15 ka tuig niya nga pagtalikod sa showbiz.  Adunay cameo role si Dindi sa Cinema One Originals movie nga “ Dahlin Nick”, nga maghisgot sa kinabuhi sa National Artist for Literature Nick Joaquin. Si Dindi maoy mudala sa papel nga Imelda Marcos ug niya pa, bisan mubo ra kaayo ang iyang partisipasyon  nag-research gyud siya og maayo.

Si Ogie magbuot

Kun siya maoy pagbut-on, ganahan si Asia’s Songbird Regine Velasquez nga magpabilin nga neutral o walay dapigan sa politika sa umaabot nga eleksyon. Apan, isip asawa, musuporta matud pa siya kun kinsay paluyohan sa iyang bana nga si Ogie Alcasid, nga maoy hinabion kanunay sa mga politiko kabahin niini.

Gisabotahe gyud ni Liz?

Adunay mga netizens ang nanawagan karon ngadto sa TAPE Inc., ang producer sa Eat Bulaga aron paghaon si Liz Uy isip stylist ni Maine Mendoza o Yaya Dub.

Kini human namantala sa www.fashionpulis.com ang usa ka hulagway ni Maine alang sa usa ka magazine photo shoot, diin ang iya matud pa nga sinena, gisul-ob na ni Liz, usa ka semana sa wala pa ang pictorial sa labing sikat karon nga female star sa telebisyon.

Suma pa sa mga netizen, tataw na kaayo nga gisabotahe gyud ni Liz si Maine sanglit ikaduha na kini nga higayon nga adunay nag-una pagsul-ob sa sapot nga gigamit ni Yaya Dub.

Ang una mao ang kontrobersyal nga gown nga gidesinyo ni Francis Libiran nga gisul-ob ni Maine atol sa Tamang Panahon Concert  niadtong Sabado, nga namatud-an nga gisul-ob na diay ni Kim Chui niadtong 2013 sa usa ka fashion show sa maong designer.

Apan depensa sa kampo ni Libiran mao nga ang pagsul-ob ni Kim sa maong gown naggumikan kay mao kini ang iyang model alang sa maong fashion show ug wala na matud pay laing nakasul-ob niini. Suma pa nga gipalit sa TAPE Inc., ang maong gown para kang Maine ug sayud matud pa ang Stylized Studio ni Liz kabahin sa istorya sa maong gown.

Karon nga nilugwa ang hulagway ni Maine nga nagsul-ob og sapot nga una nang gigamit ni Liz, gisapot na ang mga netizen ug nideklara nga gisabotahe gyud sa maong stylist si Yaya Dub sanglit suod man kaayo kini ngadto nila ni Vice Ganda ug Anne Curtis nga mga hosts sa It’s Showtime ug katigi nga show sa Eat Bulaga.

Kinsa man gyud ang Darna?

Human gipahibawo ni Angel Locsin nga dili na siya mahinayon paghimo sa Darna movie para sa Star Cinema gumikan sa deperensya sa iyang likod, daghang nagpaabot nga ipahibawo na sa ABS-CBN kinsay muhulip sa aktres.

Daan nang gibutyag ni Angel nga aduna nay napili ang management aron maoy mupuli niya ug nanghinaot siya nga suportahan gihapon kini sa publiko.

Apan ang www.abs-cbnnews.com nagmugna og listahan sa lima ka mga aktres nga posibli matud pa nga maoy muhulip kang Angel isip Darna.

1. Liza Soberano. Suma pa nga niadtong gipahibawo nga himuon ang Darna daghan na ang nanawagan aron ihatag kini ngadto sa dalagita.  Kun mahatagan ba o dili og hustisya ni Liza ang role kun ugaling siya maoy mapili, kana matud pa maoy angayan nga atangan.

2. Arci Munoz. Usa sa labing paspas karon nga nisulbong nga mga artista ug dili sab gyud ka bentahaan ang kaanyag ug ka nindot sa lawas. Gani, siya man maoy gipili nga Ginebra Calendar Girl 2016.

3. Julia Montes. Sa iyang kabatan-on daghan na matud pa og namatud-an isip drama actress. Ug ang Darna role posibli matud pa nga maoy mubukas og agianan aron mapakita pa niya ang iyang abilidad.

4. Dawn Zulueta. Pwede sab matud pa nga usbon ang istorya sa Darna diin maminyo na kini ug aduna nay mga anak ug nanimuyo nga malipayon uban sa iyang pamilya, apan adunay aksidente nga mahitabo hinungdan nga mupugos kini pagsinggit og Darna. Inig ka himo niyang Darna mabatan-on kini ug si Julia Montes matud pa ang angayan nga mamahimong anak ni Dawn ug maoy mulupad isip Darna.

5. Maja Salvador.  Kun ang script matud pa magkinahanglan og makalingaw nga Darna apan astig sab, si Maja maoy angayan sa role. Daghan na sab matud pa kini og namatud-an kun acting ang hisgutan. Apan kun dili siya mapili nga Darna, okay ra sab matud pa kaayo nga siya maoy magkontrabida isip Valentina.