Gisamokan sa mga Marites

Dear Tito Miguel,

Ako diay si Camille, taga Argao, Cebu. Naa ko’y mga silingan nga murag walay laing lingaw kundi ang paghisgot sa kinabuhi sa ubang tawo. Mga Marites ba, nga maayo kaayo mohimo og istorya bisan walay kamatuoran. Usahay, makauwaw ug makalagot na lang kay ako na hinuon ilang himoong sentro sa ilang mga chismis.

Naay higayon nga ilang giintriga nga buntis kuno ko, bisan dili tinoud. Usahay pud, ilang himoong isyu ang akong mga parcel nga pirming ideliver sa among balay. Moingon sila,gastador kuno kay ko.

Usahay, maulaw na lang ko mogawas kay basin naa na pud silay bag-ong istorya bahin nako. Makalagot kay murag bisan unsa akong buhaton, naa gyud silay ikasulti. Tito Miguel , unsaon man nako pag-atubang ning mga tawong hilig maghimo og istorya ug manghilabot sa kinabuhi sa uban? Kinahanglan ba nako silang komprontahon aron mahunong na ilang pangchismis, o mas maayo nga pasagdan na lang sila? Gusto lang ko og malinawong kinabuhi. — Camille

* * *

Camille,

Pasagdi sila. Ikaw na mismo niingon nga maski unsa imo buhaton, sawayon gihapon ka nila’g libakon. Tinuod man o dili ilang gisulti batok nimo, dili na nimo problema basta wala lang ka mamintaha sa ubang tawo. Kun mag sige ka’g hunahuna unsa kaha ikasulti nila sa mata’g lihok nimo, tabla ra nga imong gihikot imong kaugalingon sa paniid ug panan-aw sa ubang tawo. Ayaw presoha imong kaugalingon sa unsay ika-sulti sa uban, basta tarong ug patas lang ka.

Ang tinuod, dili nimo mapugngan ilang hunahuna ug baba. Wala ka’y kontrol niini, maski pa imong ipanghimakak tanan nilang tsismis bahin nimo, o maski pa awayon nimo sila. Naghago hago lang ka. Pasagdi sila, padayon lang sa imong kinabuhi nga daw wala sila sa imong palibot.

Pero ayaw’g likay, pakita nila apan ayaw duola. Distansiya lang, kun molabay ka samtang nagtapok sila, pahiyom lang ug kaway nila. Samot sila maglungot-lungot ana ka’y ilang makita nga dili ka apektado sa ilang mga tsismis bahin kanimo. Kay kun motago ka nila, imo silang gitugtan mokontrolar sa imong mga lakang. Ang angay nimo buhaton, paninguha’g maayo nga makab-ot nimo imong mga pangandoy sa kinabuhi. Kay kun malamposon na ka, sila nagpabilin nga nag-nganga. Samtang sige sila’g panaway nimo, kalit ra ka ni-asenso. Samot sila kasuya nimo, mao na’y bawos nimo ug silot nila. — Tito Miguel

Magpatambag ka? Ipada kang Tito Miguel: 0991-318-9366