Climate Change

Tinagik

ni MARIA ELEANOR E. VALEROS

Liboan ka anino ning nagpaninggit nga dahon

miparayeg sa sabakan sa yutang kulonon

mihiyodhiyod tinayhopan sa hanging gilaay

sa lapokong balili mapangahasong mitanday.

Buot mopasapnay namugos pakiglambigit

gibuhian inutnga-panghupaw-agulo-panangpit

midason pagsarap sa bitoong nangahagtak

mipupho’s tipaka ning gipanday kong balak.

Sa langit mitabas wa nay kaikog nga dag-om

kilat naggabasgabas pagtipas sa sawumsom

panganod nagyagayaga sa atong kabanikanhan

kadagatan mihamag paglumos sa kabaybayonan.

Saw-on unta’s mga anino ang napukang kahayag

sapupohon sa mga bukton ang nagtingang lamdag

iwarawara ang pangindahay nga sa yamog hunaran

ki’ng samad nga namugna sa dughan sa kalikopan.