15 Metro Manila chief prosecutors, inendorso
Zalameda bilang Chief Justice
MANILA, Philippines — Inendorso ng 15 chief prosecutors sa Metro Manila si Supreme Court Associate Justice Rodil V. Zalameda bilang susunod na Chief Justice, kasunod ng nakatakdang pagreretiro ni Chief Justice Alexander Gesmundo sa Nobyembre 6.
Sa Resolution No. 03, Series of 2026, sinabi ng NCR Chief Prosecutors Association Inc. na si Zalameda ang pinakaangkop sa posisyon dahil sa kanyang malawak na karanasan sa batas, mahusay na pamumuno at malinis na rekord sa serbisyo publiko.
“RESOLVED, that the Association shall give its full support and solely endorse Supreme Court Associate Justice Rodil V. Zalameda as Supreme Court Chief Justice vice Hon. Alexander G. Gesmundo,” ayon sa resolusyon.
Nagsimula si Zalameda bilang prosecutor sa Mandaluyong noong 1995, naging city prosecutor noong 2002, at nagsilbi ring mahistrado ng Court of Appeals sa loob ng 11 taon bago italaga sa Korte Suprema noong 2019. Siya rin ang kauna-unahang dating city prosecutor na naging mahistrado ng Korte Suprema.
Ayon sa asosasyon, taglay ni Zalameda ang kakayahan at integridad na kailangan upang pamunuan ang hudikatura at mapanatili ang tiwala ng publiko. Nagkakaisang inaprubahan ang resolusyon noong Setyembre 2 sa Muntinlupa City.
- Latest
