Mahihirap na seniors, P1K na social pension sa DSWD simula Pebrero
MANILA, Philippines — Simula sa Pebrero ngayong taon ay makakatanggap na ng P1,000 monthly stipend ang mga mahihirap na senior citizen na benepisyaryo ng Social Pension ng Department of Social Welfare and Development (DSWD).
Ayon kay DSWD Assistant Secretary for Strategic Communications Romel Lopez, ang pondo ay nakalakip sa DSWD 2024 budget base na rin sa Republic Act 11916 o ang Act Increasing the Social Pension of Indigent Senior Citizens.
Sa ilalim ng RA 11916, ang pagbibigay ng 100% increase sa buwanang pension ng mga indigent senior citizens mula P500 hanggang P1,000 ay upang matulungan ang elderly na makaagapay sa patuloy na pagtaas ng mga bilihin.
Nilinaw ni Lopez na maituturing na eligible sa programa ang isang senior citizen kung ito ay hindi tumatanggap ng monthly pension mula sa Social Security System (SSS), Government Service Insurance System (GSIS), Philippine Veterans Affairs Office (PVAO), Armed Forces at Police Mutual Benefit Association, Inc. (AFPMBAI), o sa kahit na anong private insurance company.
May kabuuang 4,085,066 indigent senior citizens ang sakop ng social pension program para sa taong 2024.
- Latest
