P1k dagdag sahod sa kasambahay, hiling

MANILA, Philippines — Umapela si House Deputy Minority Leader Harlin Neil Abayon sa wage boards na dagdagan ng P1,000 ang minimum wage ng mga kasambahay.

Ayon kay Abayon, bilang miyembro ng marginalized sector sa lipunan ay apektado rin ng inflation o mabilis na pagtaas ng presyo ng mga bilihin ang mga kasambahay.

Taong 2016 pa umano nang huling makatikim ng dagdag-sahod ang mga kasambahay sa CALABARZON at December 2017 sa Metro Manila at limang iba pang rehiyon.

Paliwanag pa ng kongresista, dapat tratuhin nang may dignidad ang mga kasambahay lalo pa at pinakamababa ang sahod ng mga nasa Region 4-A na may P1,800 kada buwan, P2,000 sa Northern Samar at ibang bahagi ng Eastern Visayas at P3,500 sa NCR.

Mainam rin umano kung magkakaroon ng online database para sa registry of domestic workers para matiyak ang compliance sa batas na nagbibigay-proteksyon sa mga kasambahay gaya ng health benefits.