Barias 'di masusungkit ang no.2 post
Dahil sa mga patong-patong na kaso sa Ombudsman ay malamang na maunsyami ang pagkuha ni Police Director Geary L. Barias bilang number two man sa Philippine National Police sa inaasahang pagreretiro ni Deputy Director Gen. Ismael Rafanan sa Marso.
Bukod sa isyu ng seniority sa PNP ay maraming mambabatas din ang umalma sa posibilidad na paghirang kay Barias bilang deputy chief for administration.
Makailang beses ng binatikos ni Sen. Aquilino “Nene” Pimentel ang paraan ng pamamalakad ni Barias nung siya ang director ng National Capital Region Police Office sa na ganap na “Manila Pen” siege noong Nov. 27, 2007 kung saan inaresto ni Barias ang 27 journalists.
Ayon kay Pimentel, “sinikil ni Barias ang karapatan ng mga mamamahayag” nang pamunuan niya ang paghuli sa mga ito.
Ayon naman kay Rep. Liza Maza ay karapat-dapat na maging no. 2 man ng PNP si Police Director General Jefferson Soriano dahil mas nauna siyang naging three-star general kaysa kay Ba rias.
“Dapat i-respeto ng liderato ng PNP ang seniority sa pagkakaroon ng estrelya upang maiwasan ang mga intriga sa hanay ng kapulisan,” ani Maza.
Kamakailan ay nakuha ni Barias ang kanyang ikatlong star. Base sa mga naunang report, si Soriano ay nagnanais din sa nasabing pangalawang posisyon.
Si Barias ang kasalukuyang deputy chief habang si Soriano ang pinuno ng directorial staff.
Si Rafanan, mistah ni Barias mula sa PMA Class 1975 at ang kasalukuyang deputy chief for administration, ay magreretiro sa March 2.
Samantala, si Soriano naman ang dating pinuno ng Task Force Usig na siyang naghawak ng kaso ng political killings sa bansa. Si Soriano din ay miyembro ng “Magilas” Class of 1976. (Butch Quejada)
- Latest
- Trending
