Opisyal na:Gaballo, Magsayo mandatory challengers nilang Donaire ug Russell

CEBU, Philippines — Ang duha ka way pildeng mga Pinoy’ng boksidor nga sila si Reymart “Assassin” Gaballo (24-0, 20KOs) ug Mark “Magnifico” Magsayo (23-0 16KOs) nahatagan og opotunidad nga mo-away alang sa World Boxing Council (WBC) title.

Kini human ang WBC mitudlo kanilang mandatory challenger sa kasamtangang kampiyon sa tagsa-tagsa nila ka mga division. Si Gaballo batok sa kababayan niining si WBC bantamweight champion Nonito “The Filipino Flash” Donaire Jr. (41-6, 27KOs) ug si Masayo batok sa Amerikanong WVC featherweight champion nga si Gary Russell (31-1, 18 KOs).

Ang 25-anyos nga si Gaballo sa Sanman Gym nagkupot karon sa WBC interim bantamweight belt nga iyang nasakmit human gipukan ang Amerikanong si Emmanuel Rodriguez pinaagi sa kontrobersiyal nga split decision niadtong Disiembre 2020.

Sa pagka karon, gisaytan ni Donaire ang usa ka unification bout batok sa kababayan niining si John Riel “Quadro Alas” Casimero, ang WBO champion, o dili ba ni Japanese ‘Monster’ Naoya Inoue, nga maoy hari sa IBF ug WBA. Apan kon dili makuha ni Donaire ang iyang gusto, hayan nga mapugos kini pagdepensa sa iyang korona batok ni Gaballo sigun sa mando sa WBC.

Sa iyang bahin, daan nang gitiradahan ni Magsayo si Russell mao nang pormalidad na lang ang gihimong anunsiyo sa WBC.

Si Magsayo, lumad gikan sa Tagbilaran City, Bohol, naka-angkon og katungod nga mohagit ni Russell human gipatikangkang ang Meksikanong si Julio Ceja sa ika-10 nga hugna sa ilang WBC eliminator usa ka bulan na ang milabay didto sa Las Vegas.