76ers gikwarantin

Human ang tulo ka players nagpostibo sa COVID-19

CEBU, Philippines — Ang guwardiya sa Philadephia 76ers nga si Seth Curry nagpositibo og balik sa Covid-19  samtang ang iyang team nagduwa batok sa Brooklyn Nets, sumala pa sa US media.

Wala magpaila nga tinubdan sa liga miingon, nga ang 76ers nagpabilin tibuok gabii sa New York ug gisugdan ang contact tracing kagahapon sa buntag (Sabado, oras sa Pilipinas)  subay sa bag-ong hugna sa test.

Ang team wala dayon mokompirmar niini.

Si Seth, igsuon ni Golden State Warriors star Stephen Curry, wala kaduwa atol sa kapildihan sa 76ers ngadto sa Brooklyn Nets tungod sa sore left ankle.

Apan diha si Seth sa 76ers bench atol sa first quarter sa wala pa siya mibiya sa Barclay's Center Arena palayo sa koponan.

Pero si Curry niduwa niadtong Huwebes alang sa 76ers ug miiskor siya og 28 puntos sa ilang 141-136 nga kadaogan batok sa Washington Wizards didto sa Philadelphia.

Ang 76ers gikatakdang moduwa karong Domingo batok sa host Denver Nuggets.

Sayo niadtong Huwebes, ang NBA ug ang players' union mipahibalo nga sa 498 ka mga magduduwa nga nagpositibo sa Covid-19 sukad niadtong Disyembre 30 sa miaging tuig, upat niini ang nagpositibo og balik.

Sukad sa pagsugod sa 2020-2021 season niadtong Disyembre 22, ang liga mipatuman og estiktong protocol nga nagkinahanglan dili lang niadtong nagpositibo, apan niadto sab nibalik sa inconclusive tests nga ikuwarantin, uban ang mga magduduwa nga nakaduol sa tawo nga na-exposed sa virus.

Kahinumduman, nga niadtong Disyembr 23, giuswag ang duwa tali sa Houston Rockets ug Oklahoma City Thunder human ang tulo ka players sa Houston ang nagpositibo sa coronavirus.