P100T ganti sa Salon de Rose Tatluhan chessfest

CEBU, Philippines – Ang mga tang-an nga magduduwa og ahedres dinhi sa Sugbo ug kasikbit nga mga probinsiya magtigi na sab sa Salon de Rose Christmas Tatluhan Chess Tournament karong Disyembre 7-8  diha sa Barracks Chess Club sa Robinsons Galleria Cebu.

Dul-an sa P100,000 nga ganting salapi ang iapud-apod sa mga mananaog ning duha ka adlaw nga torneyo nga maoy naandan nga dalit matag pasko ni Cebu chess patron Benjamin 'Bojie' Lim ug Salon de Rose nga gipanag-iya sa ilang pamilya.

Si event coordinator Jun Olis nagkanayon nga matag team langkuban og tulo ka miyembro nga dunay average rating nga 2030 basi sa September 2019 National Chess Federation of the Philippines (NCFP) ratings.

Ang makampiyon mobulsa og P30,000, samtang ang mopahiluna sa ikaduha ngadto sa ikalimang dapit makadawat og P20,000, P10,000, P7,000, ug P5,000. Ang 6th ug 7th placers  makaangkon og P3,000 ug P2,000. Ang 8th ngadto sa 15th  gantihan og P1,500 matag usa, samtang ang maapil sa top 20 dunay madawat nga P1,000.

Ang top board players duna P1,000 nga bonus.

Ang registration fee nagkantidad og P600 sa kiddies ug ladies ug P1,200 sa early birds. Kadtong moparehistro sa adlaw na sa kompetisyon didto sa binyu pabayron og P1,500.

Alang sa dugang mga detalye, kadtong mga interesado mahimong mokontak ni FIDE Arbiter Marvin Ruelan sa 0932-7152411 o 0926-7352951.