Ancajas andam na batok Rodriguez

CEBU, Philippines —  Giandam ni Pinoy boxing champion Jerwin Ancajas ang iyang kaugalingon sa usa unya ka brutal ug mas lisud nga sangka batok ni Mexican challenger Jonathan Rodriguez sa karong Nobiyembre 2 didto sa California.

Kini ang ikawalong title defense ni Ancajas sa iyang IBF super flyweight tite. Una niyang nasakmit ang bakus niadto pang 2016 dihang iyang gikulata ang Puerto Rican legend nga si McJoe Arroyo.

Bisan nasayod siya nga dili sayon ang umaabot nga sangka, si Ancajas  naghinam-hinam gihapon tungod kay gusto niya nga masuwayan kon asa siya kutob. Nagtuo sab siya nga si Rodriguez ang makahatag niya og nindot nga away.

Si Ancajas adunay 19-fight winning streak ug siya ang giisip nga ikatulo nga labing aktibong world champion karon sunod ni WBC heavyweight king Deontay Wilder.

Sa iyang bahin, dili basta-basta si Rodriguez nga aduna na'y upat ka sunod-sunod nga  daog pinaagi sa knockout.