Green Lancers laraw moihaw sa Panthers

CEBU, Philippines —  Naglaraw ang three-time defending champion University of the Visayas (UV) Green Lancers  nga usban og pilde ang University of Southern Philippines Foundation (USPF) Panthers sa dihang mag-abot sila  pag- usab sa 19th Cebu Schools Athletic Foundation, Inc. (CESAFI) men's basketball tournament karong adlawa diha sa Cebu Coliseum.

Gikan sa upat ka sagunson nga daog nga naghatod kanila sa kinatas-ang dapit sa seniors division standings bitbit ang 5-1 record, gitak-op sa Lancers ang ilang kampanya sa unang hugna pinaagi sa paglampurnas sa Panthers, 102-82 niadtong Oktubre 1.

Nanghinaut ang Lancers nga pahugtan pa ang ilang pagkupot sa liderato sa ilang pakigsangka batok sa samaran nga Panthers sa alas-6:45 sa gabii.

Ang Panthers bag-o lang gibugno sa University of San Jose-Recoletos (USJ-R) Jaguars sa iskor nga 61-77 pagsugod sa ikaduhang hugna sa eliminasyon niadtong Oktubre 5.

Sa pasiunang duwa sa alas-5:15 sa hapon, ang UV Baby Lancers mosuway og bangon sa makapadismaya nga kapildihan sa dihang ilang hamagon ang Cebu Institute of Technology-University (CIT-U) Baby Wildcats.

Ang Baby Lancers gipakuratan sa Don Bosco Greywolves sa isksor nga 61-67 niadtong Dominggo nga nakatagak kanila sa ikatulong dapit sa juniors division uban ang 4-2 nga baraha.

Hinuon, inilog sila batok sa Baby Wildcats nga kausa pa makadaog sud sa lima ka duwa.