EF Surplus, 4Nichole's 4-0 na sa CLBA Season 3
CEBU, Philippines – Midaog na sab sa ikaupat nga higayon ang defending champion EF Surplus dihang ilang gipilde ang Nazarene, 71-66 sa Consolacion Liloan Basketball Association (CLBA) Season 3 niadtong Martes didto sa GT Academy gym sa Tayud, Lilo-an.
Sila si Romnick dela Rama ug Paul Abenaza parehong miratsada og 20 puntos aron pangulohan ang EF Surplus nga nakabawi human mabiyai og dos puntos sa halftime, 29-31.
Ang tirador nga si Fury 'Triggerman' Trazona wala kaayo makaarte ug igo lang nga miiskor og 11 puntos alang sa iyang team nga aduna na'y 4-0 nga baraha.
Human milabaw og singko puntos, 55-50 sa third period, wala na molingi pa ang EF Surplus hangtod nga nahurot ang gitagal nga oras.
Tulo sab ka players sa Nazarene ang miiskor og double pinangulohan ni Ireland Dublin nga mikabkab og 23 puntos.
Sa laing aksiyon, ang 4Nichole's miiskor sab og daog pinaagi sa paglubong sa Gyro Steel, 69-49.
Parehong mipupo og 15 puntos sila si Dave Casiao ug Ronald Amorin ang mangulo sa 4Nichole's, gisundan nilang Rey Japos ug Niño James Icot nga miani og 11 puntos matag usa.
Kontrolado sa 4Nichole's ni coach Sugar Adaptar ang duwa. Gani ang 11 puntos nilang labaw sa halftime, 33-22 gipaburot pa ngadto sa 51-33 human sa tulo ka kuwarter nga maoy naghawan sa ilang dalan ngadto sa kadaogan.
Gumikan niini, ang 4Nichole's ni Mitcham Tiro nagbitbit sab og 4-0 nga baraha.
Ang liga nga gipasiugdahan sa presidente niining si Arnold Labustro ug bise presidente Henry Agbon, gipaluyohan sa Union Galvasteel ug JJ Surplus.
Ang mga duwa gipadagan ni league commissioner Fury Trazona.
PUNTOS MATAG USA
Unang duwa:
EF Surplus (71) – Dela Rama 20, Abenaza 20, Trazona 11, A. Sabang 2, Ponce 2, Nuñez 2, Pepito 2.
NAZARENE (66) – Dublin 23, Noble 20, Fuentes 10, Lascuna 9, Balaod 2.
Ikaduhang duwa:
4NICHOLS (69) – Casiao 15, Amorin 15, Japos 11, Icot 1, Arnoza 8, Trazona 5, Apas 5, Rolando 2.
GYRO Steel (49) – Villacortes 14, Joaquin 11, Lamadona 6, Ruales 6, Cal 4, Tomas 2.
- Latest
