Cousins dili na kaduwa sa playoffs

CEBU, Philippines — Seryoso ang nahiaguman nga injury ni DeMarcus Cousins human siya mahagba sa unang kuwarter atol sa kapildihan sa Golden State Warriors batok sa LA Clippers sa Game-2 sa ilang NBA first round playoff series niadtong Martes.

Human gipaubos sa MRI exam (magnetic resonance imaging) kagahapon, nakompirma

sa mga doktor nga dunay gisi ang unod sa walang paa ni Cousins hinungdan nga wala pa'y klaro kun kanus-a kini makaduwa og balik.

Matud pa sa Warriors nga si Cousins magsugod dayon sa iyang rehabilitasyon ug mopagawas lamang siya og 'update' sa iyang kondisyon kun gikinahanglan.

Si Warriors coach Steve Kerr mipahibawo nang daan human sa 135-131 nilang kapildihan batok sa Clippers nga si Cousins lagmit dili makapakita'g aksiyon sa hataas nga panahon.

Miduwa sa ikaduha pa lamang nga playoffs sa iyang karera human sa siyam ka tuig nga pinaabot, si Cousins natumba sa unang kuwarter atubangan sa ilang bench human niya gisuwayan og ilog ang bola gikan ni Patrick Beverley sa backcourt. Dihadiha iyang gigunitan ang wala niyang paa ug  nagtakiang na padung sa ilang locker room sa oras nga 8:09 sa unang kuwarter.

Si Cousins nakaduwa og balik niadto lamang Enero human sa dul-an usa ka tuig nga pahuway gumikan sa injury sa wala niyang tiil  dihang nagsul-ot pa siya sa uniporme sa New Orleans Pelicans.