Cavs masaligon nga makabawos

CEBU, Philippines – Takilid man tuod sila sa serye, apan ang Cleveland Cavaliers masaligon nga makabawos sila sa Boston Celtics sa ilang pag-host sa Game-3 sa best-of-seven NBA Eastern Conference finals karong adlawa didto sa Quicken Loans Arena sa Cleveland, Ohio.

Ang Cavaliers gisagunsonan og pilde sa Celtics sa nag-unang duha ka duwa sa serye, apan nagpabilin silang kalmado.

"We know what it takes. We're down 0-2. No need to panic," dason pa ni Cavs coach Tyronne Lue.

Susama sab ang panahom ni All-Star forward Kevin Love nga nagkanayon nga dili sila angayan nga mabalaka kay nakahibalo man sila kun unsay ilang pagabuhaton.

Labaw sa tanan, ang Cavs nag-agi na sa maong matang nga sitwasyon.

Duha ka tuig ang milabay, nalubong sila og 0-2 ug dayon 1-3 sa NBA Finals batok sa Golden State Warriors, apan nakahimo sila og dakong milagro aron dag-on ang serye sa pito ka duwa ug hatagan ang Cleveland sa labing una niining kampiyonato sud sa 52 ka tuig.

Angayan hinuon nga magmatngon ang Cavs gumikan kay ang Celtics nagpanikad pagpadayon og ratsada ilabi na kay anaa karon nila ang momentum sa serye.

Sa gihapon, si LeBron James na sab maoy maghatag kanila og labad sa ulo, apan ang Celtics andam nga mopugong sa opensa sa four-time MVP.

Gawas ni James, kinahanglan sab nga mosalida sila si Love, Kyle Korver, Tristan Thompson ug ang duha ka guwardiya nga sila si J.R. Smith ug George Hill, ilabi na kay kanunay lang silang mawani nilang Jaylen Brown ug Terry Rozier sa Celtics.