Cavs gipakauwawan sa ilang balwarte

CEBU, Philippines — Mibugwak og nagkayong opensiba sila si Paul George, Russell Westbrook ug Carmelo Anthony sa dihang gipakauwawan sa Oklahoma City Thunder ang Cleveland Cavaliers, 148-124 sa adlaw nga si Lebron James naglaraw nga mokulit og kasaysayan sa NBA kagahapon didto sa Quicken Loans Arena sa  Cleveland, Ohio.

Si George miburak og 36 puntos, si Westbrook dunay 23 puntos ug 20 ka assists, samtang si  Anthony mikadlit og season-high 29 puntos alang sa Thunder nga mitabla sa rekord sa labing daghan nga  puntos nga gitala batok sa Cleveland team. Ang Philadelphia nakaiskor sab og 148 batok sa Cavs niadtong 1972.

Sa gihimong paglubong kanila sa Thunder, dili malimod ang kadismaya ni James.

“I’ve never in my basketball life gave up 148 points, not even probably playing video games,” matud pa ni James agi’g padayag sa iyang kasagmuyo. 

Ang nagkagidlay nga Cavs napilde na og kanapulo sa 14 ka duwa sa miaging 12 ka adlaw ug ang  nakaparat kay gilubong sila og 28, 34 ug 24 puntos.

Daw misamot og kabati ang ilang sitwasyon nga lagmit mapalagpot si coach Tyronn Lue sa iyang  puwesto.

Apan si James nanghinaut nga dili kini mahitabo gumikan kay taas gihapon ang iyang pagsalig sa  ilang koponan

“I would hope not, but I really don’t know,” tubag pa ni James sa dihang gisukna sa posibilidad nga taktakon si Lue.

Si James mitapos uban ang 18 puntos ug siyete puntos na lang ang iyang kulang aron mohimo og  kasaysayan isip labing bata nga miyembro sa 30,000-point club sa NBA. 

Wala’y duda nga makab-ot kini ni James sa dihang ilang sangkaon ang San Antonio Spurs 

karong Miyerkules. Kun molampus, siya maoy ikapitong player nga nakaangkon sa maong dungog sa kasaysayan sa liga.

Iya unyang ikauban ang mga banggiitang pangan sa liga nga naglangkob nilang Kareem Abdul-Jabbar (38,387 points), Karl Malone (36,928), Kobe Bryant (33,643), Michael Jordan (32,292), Wilt Chamberlain (31,419) ug Dirk Nowitzki (30,808).

Gawas nilang George, Westbrook ug Anthony, misalida sab si Steven Adams nga kausa lamang masipyat sa 13 niya ka itsa aron pagtapos og 25 puntos.

Ang Cavs wala kaugpo bisan og si Isaiah Thomas mipupo og season-high 24 puntos.

“We gotta go back to the drawing board on that end,” sumala pa ni  Thomas agi’g pahungaw sa  kalugwak sa ilang depensa hinungdan nga gilat-an sila sa Thunder.

Sa sinugdanan pa lang daan, daw klaro na ang kalbaryo sa Cavs human sila gibombahan og 76 puntos sa Thunder.

 Sa maong duwa, ang OKC milubong sa Cavs og 31 puntos, timaan sa ilang dominasyon.

Didto sa Houston, si Chris Paul mipabuhagay og 33 puntos, 11 ka rebounds, pito ka assists ug tulo ka steals sa dihang gipaksit sa Rockets  ang  Golden State  Warriors, 116-108.

Si James Harden midugang og 22 puntos ug walo ka assists, samtang si Clint Capela dunay 18 puntos, lima ka assists ug upat ka steals alang sa Rockets nga nagbitbit na  karon  og 32-12  win-loss record. 

Ang Warriors nadakin-as ngadto sa 37-11.