AsPac U Games mosikad na

CEBU, Philippines — Dagkotan og balik sa University of the Visayas (UV) Green Lancers ug University of San Carlos (USC) Warriors ang kayo sa karaan nilang panagkaribal sa dihang ang 2nd Asia Pacific University Games (APUG) mosikad na karong adlawa diha sa Cebu Coliseum.

Ang Lancers ug ang Warriors, nga nagbangga sa finals sa duha ka sunod-sunod nga season sa Cebu Schools Athletic Foundation, Inc. (CESAFI) niadtong 2015 ug 2016, magbangga sa pasiunang duwa nga gikatakda sa alas-3 sa hapon.

Sa ikaduhang duwa sa alas 4:30 sa hapon, ang University of Southern Philippines Foundation (USPF) Panthers makigtakus sa Universiti of Technologi Mara sa Malaysia, samtang ang University of San Jose-Recoletos (USJ-R) Jaguars makigtige sa Jiangxi Provincial Pingxiang Experimental School sa China sa main game sa alas-6 sa gabii.

Ang tulo ka nasud nga torneyo magsubay og single round robin format. Ang top 2 teams maoy magsangka sa kampiyonato nga gikatakda karong Disyembre 11.

Gawas sa basketbol, lain pang mga events nga kumbatihan mao ang table tennis sa Robinsons Galleria Cebu, badminton sa Racket Zone sa Montebello Villa Hotel ug lawn tennis sa CitiGreen Tennis Resort. (BANAT NEWS)