Webmasters mapasigarbuhon, bisan napilde

CEBU, Philippines — Napilde man tuod sila sa University of the Visayas (UV) Green Lancers sa finals, apan ang University of Cebu (UC) Webmasters nagpabilin nga mapasigarbuhon gumikan sa maanindot nilang salida nga wala damha sa uban sa bag-ohay pang natapos nga 17th Cebu Schools Athletic Foundation, Inc. (CESAFI) basketball season.

Daghang kilay nga miisa human sa kalit lang si Raul ‘Yayoy’ Alcoseba mibutho isip head coach sa UC, apan gipahilom niini ang iyang mga kritiko human iyang gitimon ang Webmasters ngadto sa kampiyonato.

Nakasikit pa gani og maayo ang Webmasters ngadto sa pagsakmit sa labing una nilang korona sulod sa unom ka tuig human ilang gipakuratan ang defending champion sa Game-1 sa ilang best-of-three championship series.

Apan nahugno ang ilang damgo human sila misukarap sa sunod nga duha ka duwa sa serye.

“It was unfortunate. We won game one, but we lost two straight games. My goal is always to win a championship but it is not always the case,” matud pa ni Alcoseba.

Bisan pa man niini, si Alcoseba gibati gihapon  og tumang kalipay sa ilang naabot ilabi na kay wala siya hatagi sa uban og maayong tsansa nga  makasulod bisan na lang gani sa semis sa wala pa magsugod ang torneyo.

“Nobody counted us to be in the final four or better yet in the finals. But we did and even won Game-1,” dason pa sa gitamod nga winningest coach sa kasaysayan sa Cebu basketball.

Si Alcoseba nga nakadaog na og lima ka titulo sa tulo ka managlahing tunghaan nga iyang nakuptan, mipasabot nga ang kakulang og kasinatian sa iyang mga magduduwa usa sa labing bug-at nga hinungdan sa ilang pagkahagba sa mga kamot sa inilog nga Lancers.

Apan taliwala niining tanan, si Alcoseba midayeg sa iyang mga batos gumikan sa gipakita nilang kadasig ug paningkamot nga naghimo kanilang mga mananaog sa iyang mga mata. (BANAT NEWS)