Global Cebu nakabawos sa JPV Marikina
CEBU, Philippines — Human mapukan duha ka higayon sa miagi nilang tulo ka duwa, ang Global Cebu FC nakapanimawos na gyud sa JPV Marikina pinaagi sa sikit nga desisyon, 2-1, sa Philippines Football League niadtong Domingo sa gabii diha sa Cebu City Sports Center.
Sa maong kadaogan, ang Global FC nagpabilin sa ikaupat nga dapit sa liderato bitbit ang 37 puntos, sunod sa FC Meralco Manila (45), Kaya Makati (41) ug Ceres Negros FC (38).
Samtang ang JPV Marikina natagak ngadto sa ikaunom nga puwesto uban ang 27 puntos, biya lamang og usa ka lugas sa Stallions Laguna.
Si Paolo Salenga maoy unang naka-goal sa Global FC sa nakaon nga tulo ka minuto sa duwa ug gisundan kini ni Hikaru Minegishi sa ika-49 nga minuto nga nakahatag kanila og 2-0 nga labaw sa halftime.
Mipakita og agresibong duwa ang JPV Marikina sa second half, apan igo lamang naka-goal sa ika-52 nga minuto kortesiya ni Jay Baguioro.
Ang Global Cebu nanghinaut nga mokatkat sa mas taas nga bahin sa standings sa dihang ilang sangkaon ang Kaya FC Makati karong Oktubre 21 didto sa University of Makati stadium. (BANAT NEWS)
- Latest
