Celba ‘drafting’ himuon na karong gabii

CEBU, Philippines - Himuon na karong gabii ang ‘drafting’ sa bag-ong naporma nga Cebu Legends Basketball Association (CELBA)  diha sa Housing covered court sa Barangay Canduman, dakbayan sa Mandaue.

Pangandam kini alang sa labing unang liga sa ballclub nga pagauloha’g “CELBA Christmas League” nga gikatakda karong Disyembre 17 sa mao gihapon nga binyu.

Napulo ka teams ang maghinagpatay og mga magduduwa nga paduwaon sa ilang  koponan. Nag-una niini ang team Coloscos ni CELBA  interim president P/Insp Dondon Coloscos ug Alcover ni interim vice president Engr. Tony Alcover.

Ang lain pang mga  team mao ang Lisen ni Gilbert Lisen, Quiñahan ni Eboy  Quiñahan, Sebandal ni Gilbert Sebandal, Gastardo ni Romy Gastardo, Larrobis ni Bacs Larrobis,  Cabaluna ni Alfredo Cabaluna, Velasco ni SPO2 Jennifer Velasco ug Tion ni SPO4 Racy Tion.

Giawhag ni P/Insp Coloscos ang tanang mga miyembro sa pagtambong sa  mahinungdanong kalihukan karong gabii sa alas-6 hangtod sa alas-10 sa gabii aron masayod sila kun asa sila nga team mahisakop.

Niadtong interesado apan dili   makatambong  tungod sa mga kakulian o personal nga rason mahimong  mopahibawo ni P/Insp Coloscos pinaagi sa text o tawag sa 09235767419. (BANAT NEWS)