Sanman boxers WBC Asia titles ang tirada
CEBU, Philippines - Duha ka tadhang boksidor sa Sanman Boxing Club nga sila si Reymart Gaballo ug Romero Duno gikatakda nga makigharong batok sa tagsa-tagsa nilang mga kontra gikan sa Thailand alang sa duha ka bakanteng titulo sa World Boxing Council (WBC) Asia Boxing Council.
Ang maong double championship event nga gibansagan og “Battle in Tupi” giplastada aron pagdugang og lamas sa tinuig nga Kasadyaan Festival karong Septiyembre 10 didto sa Tupi, South Cotabato.
“We are happy to present the biggest show in South Cotabato this year and I’m sure fans will enjoy a great night of boxing,” matud pa ni Jim Claude ‘JC’ Manangquil, ang Chief Executive Officer sa Sanman Promotions nga maoy nagpasiugda sa maong boxing event.
Si Gaballo nga wala pa’y pilde sa 14 ka away diin 12 sa iyang mga biktima gipalukapa, makigbinukbukay ni Manot Comput alang sa WBC Asia super bantamweight title, samtang si Duno nga nagbitbit og 10-1 nga baraha uban ang 9KOs, makigsinukliay og kumo ni Paiboon Lorkam alang sa WBC Asia super featherweight title.
Bisan tuod og inilog, sila si Gaballo ug Duno dili angay nga mokompiyansa gumikan kay ang ilang engkuwentrohon nga mga Thai pareho mang mipakamang sa ilang mga kontra sud lang sa usa ka hugna sa miagi nilang mga away. (BANAT PALARO)
- Latest
