UV pakyas sa ilang misyon sa Batang PBA

CEBU, Philippines - Ang University of the Visayas (UV) pakyas sa ilang tinguha nga makataak og balik sa national finals sa Batang PBA developmental basketball tournament nga gipaluyohan sa CloudFone.

Kini human sila napilde ngadto sa Sta. Clarita International School of Iloilo sa regional finals nga natapos niadtong Domingo didto sa Magis Eagles Arena sa Sacred Heart School-Ateneo de Cebu  sa Barangay Canduman, dakbayan sa Mandaue.

Duha lang unta ka daog ang gikinahanglan sa UV, apan wala kini nila makab-ot gumikan kay human gibuntog ang Sta. Clarita International, 78-70, nahagba sila sa mga kamot sa STI-West Negros University of Bacolod, 65-67.

Gumikan kay parehong nagbitbit og baraha nga 1-1, gigamit ang Olympic quotient system aron pagbuak sa panagtabla. Human sa makuting kuwentada, ang Sta. Clarita maoy mipatigbabaw bugti sa 15-puntos niining demolisyon sa STI-Bacolod.

Mao kini ang labing unang higayon nga dili Cebu team ang morepresentar sa Visayas ngadto sa Batang PBA National Finals sukad gilusad ang maong torneyo alang sa mga basketbolista nga nag-edad og 13 hangtod sa 16 anyos niadtong tuig 2012. (BANAT PALARO)