Cebuano pro Miller moAPIL sa Xterra Albay

CEBU, Philippines - Ang pambato sa Sugbo nga si Joseph Miller seguradong magpas-an og bug-at nga tahas sa iyang tinguha nga makaangkon og dungog sa Xterra Albay, ang labing lisud nga off-road triathlon race sa nasud nga mosikad karong adlawa didto sa Legazpi, Albay

Kini kay si Miller, ubos sa Team Ford Forza, makigbatok man sa 12  ka pro triathletes nga gipangulohan ni defending champion Bradley Weiss sa South Africa  ug  Ben Allen sa Australia, ang iyang magtutudlo nga kanhi grandslam champion sa maong karera.

Lain pang mga dekalibre nga entrante sa men’s pro division mao sila si Cameron O’neal ug Charlie Epperson sa Guam, Michal Bucak sa Croatia, Taylor Charlton sa Australia, Hsieh Chung Sing sa Hong Kong ug  Brodie Gardner sa Australia.

Sa women’s pro, walay Pinay nga partisipante. Bag-o sab nga kampiyon ang koronahan unya gumikan kay ang midaog sa miaging tuig nga si Flora Duffy dili man modepensa kay kasamtangan kining nagbansay alang sa Rio Olympics.

Gumikan niini, mag-ilog alang sa korona mao sila si  Jacqui Slack, Mieko Carey sa Guam, Alena Stevens, Daz Parker, Renata Bucher ug Dimity Lee-Duke.

Gawas sa mga pro, lain pang 200 ka mga partisipante ang nagtinguha nga makakuha og luna alang sa 2016 Xterra World Championships (BANAT PALARO)