Ang gift of tongue

Naukay ang mga dumadapig ni Fr. Darwin Gitgano usa ka eksorsista, ug CFD Debater gikan sa Dyosesis sa Tagbilaran gumikan ning isyu nga kuno siya gipugngan una nga mohimo og mga seminars dinhi sa Artsdyosesis sa Sugbo tungod ning isyu sa Gift of  Tongue kun Glossolalia. Ang Google ni define niini ingon nga: “The phenomenon of (apparently) speaking in an unkown language especially in religious worship especially by Pentecostal and Charismatic Christians.” Ilang sukaranan niini mao man kadtong nahitabo sa Adlaw sa Pentecostes diin nagkapundok ang mga apostoles ug mga tinun-an nga nikunsad ang Espiritu diha sa dagway sa dila nga kalayo., diin ang mga tawo nakadungog gayud nga ang mga matuohon nakasulti og mga lain laing mga pinulongan. (Buhat 2;4). Kasagaran mahitabo kining maong phenomenon sa mga Life in the Spirit Seminars, prayer meetings ug uban pa. Ang mosunod nga mga pagpasabot atong gikutlo gikan sa libro nga sinulat ni Padre Nonette Legaspi usa ka Eksorsista sa kaulohan.

Matud pa dunay duha ka mga habig nga nituki kalabot sa speaking in tongues. Kining maong mga habig mao man Continuationism ug ang Cessationism.

Ang Continuationism nagtuo nga ang gasa sa Espiritu Santo sa pagsulti og lain laing mga pinulongan ang nagpadayon gihapon hangtud karon. Sa laing bahin ang habig ang  Cessationism  nagtuo nga human nahitabo ang maong phenomenon nga mao ang glossolalia sa adlaw sa pentekostes nahunong sanglit ang maong hitabo mao man ang nagmatuod kanila nga nakasaksi nga ang mga apostoles gikan gayud sa Dios. Gikan niadto nilambo ang simbahan ug nikaylap ang mensahe ngadto sa tibuok kalibutan ug kaliwatan nga dunay lain laing mga pinulongan. Hinuon atong hinumdoman nga kining duha ka mga habig dili gikan natong mga Katoliko kondili kanila nga nagtuo sa Sola Scriptura kun Scriptures alone.

Unsay baruganan nato isip mga Katoliko Kalabut niini?

1.  Ang simbahan wala magtudlo sa Sola Scriptura nga baruganan.

2.  Dili kini isyu kun Continuationism o Cessationism.  Ato kining gisud-ong ingon nga gasa kun Karisma gikan sa griyegong pulong Karis diin nagasukad ang terminong Charismatic. Padayong nigasa ang Espiritu Santo niini sa Simbahan segun sa iyang panginahanglan ug konteksto. Dili lang speaking in tongues ang gasa sa Espiritu Santo hinunoa anaa usab ang gift of healing, prophecy, etc., nga kun buot hunahunaon maka-Dios, espirituhanon, ug praktikal. Makapabulahan sa tibuok Katilingban ug dili lang pipila nga gigasahan niini.

3.  Katungod ug katungdanan sa Inahang Santa Iglesya ang makanunayong pagpamalandong ingon man pagmatuod kun ang bisan unsang gidudahan nga Milagroso ug dili kasarangang mga hitabo iya ba gyud sa Dios. Ang maong paghukom ipasikad gyud sa Magisterium, Balaang Kasulatan, ug Tradisyon. Nga sa ato pa, wala moingon ang Simbahan nga dili possible nga madawat gihapon ang maong mga gasa ning atong kapanahonan.

4.  Atong pamalandongan ang kalainan sa Glossolalia ug xenoglossy. Ang glossolalia nagpasabot nga ang mga pulong gilitok tinuod nga mga pinulongan. Sa Buhat sa mga Apostoles tataw kaayo nga ang mga nakasaksi nahingangha ning maong hitabo sanglit nakadungog man sila nga gilitok ang ilang mga pinulongan (Buhat 2;6). Sa lohika pa nagpasabot kini nga ang gipanglitok mga TERMINO sanglit makahuloganon man ang ilang gipanulti. Sa laing bahin xenoglossy mao man ang paglitok og bisan unsa nga dili hisabtan. Bisan gani tingali ang naglitok wa makasabot. Mahimong ihatag kini ingon nga permanenteng gasa gikan sa Dios apan matud pa ni San Pablo kun wala ang gugma kining tanan wala gihapoy kapuslanan. (Sumpayan pa)