Kampiyon sa serbisyo

Patay na dihang nakit-an ang 60-anyos nga Barangay Health Worker (BHW) sa Barangay Uling, Naga City human maanod sa baha niadtong Martes sa hapon.

Gikan intawn sa health center si Maria Dolores Saguisabal sanglit mitabang siya sa gipahigayon nga supplemental immunization.

Sa iyang pagpauli, uban sa iyang apo nga lalaki, ilang gilatas ang sapa sa Sitio Langub paingon sa ilang pinuy-anan sa Sitio Gaway-gaway dihang kalit nga mikusog ang bul-og sa tubig pasado alas 4 sa hapon niadtong Martes, Mayo 9, 2023.

Dali nga giitsa ni lola Dolores ang iyang apo paingon sa tampi hinungdan nga kini naluwas. Apan gidagit siya sa naghaguros nga sug sa sapa hinungdan sa iyang kamatayon.

Didto na makit-i ang iyang patay'ng lawas sa Sitio Sayaw sa silingang barangay sa Balirong mga tunga ngadto sa usa ka kilometro ang gilay-on gikan sa dapit diin siya gianod.

Ang nahitabo ni lola Dolores usa lang sa mga risgo nga giatubang sa mga BHW sa way pagpangwenta sa ilang serbisyo ngadto sa publiko.

Ang uban nila nag-alagad nga boluntaryo og way gidawat nga honorarium bisan usa ka dako gikan sa barangay tungod kay gikontrahan sa kapitan.

Dihang mitumaw ang pandemiya sa COVID-19, ang mga BHW lakip sa mga unang nakig-asdang sa makamatay nga sakit.

Kini ilang gihimo sa ngalan sa pag-alagad bisan way kasiguradohan ang ilang kinabuhi ug wa magpaabot nga bayran sa gobiyerno sa risgo nga ilang gisuong.

Mao nga alang sa mga mayor ug mga kapitan nga nanaktak og mga BHW tungod lang sa politika angayan mong mauwaw niining nahitabo ni lola Dolores.

Ug hinaut nga ang iyang gidangatan maoy mopukaw sa mga hingtungdang opisyal sa kagamhanan nga panahon na nga atong hatagan og hustong benepisyo ang mga BHW.

Panahon na nga hatagan sila og regular nga sweldo ug benepisyo sama sa ubang nag-alagad sa gobyerno.

Ang mga BHW maoy tinuod nga kampiyon sa pag-alagad diha sa kabarangayan ug dili sila angayang itratar sa mga kapitan ug mga mayor nga piyon sa ilang pamolitika.