EDITORYAL — Visa-free entry sa mga Chinese
Gatosan na ka mga Chinese nationals ug pipila ka mga indibidwal gikan sa ubang mga nasud sa South East Asia ang nangadakpan sa sagunsong operasyon sa mga otoridad batok sa mga illegal online gambling operations ug online love scam hubs dinhi sa nasud.
Niadto lang niaging semana, 31 ka mga Chinese nationals ang nangadakpan sa Panglao ug Dauis sa probinsya sa Bohol tungod sa operasyon sa gitawag nga romance scam hub.
Ang mga biktima sa grupo, mga langyaw sab didto sa laing nasud ilabi na sa Amerika ug Espanya.
Ang mga suspek gikatahong nakasulod dinhi pinaagi sa tourist VISA, apan nalapas na ang gihatag nga tagal kanila ug nagpuyo naman hinuon dinhi.
Matud pa sa National Bureau of Investigation gibana-banang abot na og 10 milyones ngadto sa 30 milyones dolyares ang nakawat sa grupo nga gipaagi sa crypto currency.
Ang pangutana, unsa may gibuhat sa gobiyerno batok aning mga Chinese nationals nga niabusar sa 14-day Visa –free entry?
Atong Enero ning tuiga, gianunsyo sa Department of Foreign Affairs nga puyde nang makasulod ang mga Chinese nationals dinhi bisan wala silay visa basta kutob lang sila sa 14 ka adlaw dinhi.
Apan murag giablihan sa Pilipinas ang iyang pultahan para sa mga abusado, nga hasta kusina ug kwarto sa panimalay niini gisulod na sa mga sindikato.
Samtang nakasabot ta sa tumong nga para ni sa pagpakusog sa turismo sa nasud, gibutang sab niining paagiha sa peligro ang seguridad sa nasud ug nahimong salag sa mga sindikato sa mga mangingilad ang nasud.
Kinahanglan sab unta nga kaning mga hingtungdang ahensiya nga gitahasang mag-monitor sa mga mosulod nga mga langyaw, nga motrabaho gyud.
Monitoring gyud kung asa paingon kining mga Chinese nationals nga naka-avail sa visa-free entry sa Pilipinas kay ang uban nag-operate na og mga scam hubs dinhi sa nasud.
Ang pinaka-epektibong pamaagi, hunongon na kining visa-free entry sa Chinese nationals tungod sa kadaghan na sa mga nadakpang niabusar niini.
- Latest















