Arogante ra!

Nakaani og grabeng kasuko sa mga netizens ang isyu sa inahan ug anak nga nakasinati og diskriminasyon sa usa ka sikat nga hotel sa dakbayan sa Lapu-Lapu diin gipabuhagay niini ang ilang experience sa usa ka travel review site. Gusto sa inahan nga makamugna og awareness sa mga sama niyang mga ginikanan kansang mga anak adunay special need kay dili lalim ang ilang nahiaguman ug labaw nga traumatic sa bata. Katungod man usab niya nga ipaambit ang iyang gibati pinaagi sa pagpahungaw sa pamasin nga magaangaanan ang kahiubos ug kalooy sa iyang anak.

Ang mga bata ma adunay autism o wala magpakabata gyud na nga dili makapugong sa ilang gibati. Kong malipay ila gyud nang i-express pinaagi sa pagkatawa, pagsinggit o bisan unsa nga aksyon aron lang mapadayag ang ilang gibati, gani ang mga dagko ma-carried away pa man kong sobrang ma-excite, ang mga bata pa kaha.

Angayan baya nga mapahinumduman ang tag-iya o tagdumala sa hotel nga ang mga kliyente nila maoy naghatag kanila og panginabuhi. Foreigner man o local, dako kaayo og utang kabubut-on ang management sa hotel nga aduna pay nag-patronize kanila bisan pa man sa krisis karon.

Makahilap sa kasing kasing nga ang excitement sa bata nga wala kagawas og balay sulod sa walo ka buwan tungod sa pandemic, sa kataposan mahatagan og utlanan human siya giadto og resort sa iyang inahan apan mao na hinuon kadto ang iyang nahiguman. Misamot kalagot ang gibati sa mga tawo dihang nabasa ang tubag sa major shareholder sa edipisyo nga nag-insulto sa inahan ug migamit sa Google isip basihan sa iyang kaugalingong interpretation mahitungod sa autism.

Dinhi murag naghikog ang management sa hotel kay gisamotan sila og kuninit sa mga tawo nga naa gani nag-awhag nga iboycot sila, base sa inside information naa gyud kunoy mga kliyente nga nikanselar sa ilang booking sa hotel.

Para nako unfair pud nga gustong ipasira ang hotel kay daghang mga staff intawon ang maapektohan nga naay gipangbuhi nga pamilya. Maayo man ang tag-iya sa hotel kay kwartahan naman pero kadtong mga trabahante ang makaluluoy.

Arogante gyud tinood kong atong basehan ang tubag sa management kinsa nagkinahanglan og dukol aron makamata siya sa iyang pagka taklesa, ang nahitabo sa ilang hotel karon nagpakita kanila nga bisan og anaa sila sa itaas mahimo diay silang mabitad paubos tungod sa bulok nilang systema.