Dili sa tanang higayon

Lisud baya gyud ning panahon sa pandemiya. Daghan ang nawad-an og trabaho, daghan usab ang nangindahay nga mamahimong hapsay ang dagan sa ilang kinabuhi apan ang pandemiya nagbabag kanato nga magpuyo sa mas normal nga kinabuhi ang giingon nilang new normal mura man nuon og dili normal  sanglit dili man gyud  kini ang atong naandan mao nga malisod alang kanato ang tanan.

Apan bisan pa man niini, mahinungdanon gihapon ang pagtabang ingon man ang pagbuhat og maayo alang sa uban. Ang pagbuhat og maayo maoy makapahimo natong mobati og maayo. Anaa ang sense of fulfillment. Anaa ang sense of satisfaction.

Sa laing bahin, himoon natong abli ang atong kaugalingon sa dakong posibilidad nga dili sa tanang higayon ang tanan nga atong gihimoan og maayo modason sa atong kaayo. Dunay uban nga human nila makuha ang ilang tuyo nahimong mga tawong wala nay pagpakabana sa mga hinungdan sa ilang kalampusan. Dili na sila molingi. Sakit man palandungon apan pilit natong dawaton kay diha sa paghimo og maayo dili naman kinahanglanon nga magpaabot pa kita og bawsan aron sa ingon mamahimo kitang malipayon.

Nahimong kabahin sa akong sistema nga mobalik balik gyud ako sa mga tawo nga maoy hinungdan sa akong naabtan karon. Kun wala sila wala unta ako karon mao nga bisan kun daw sa tan-aw nila nahupas na ang ilang obligasyon sa pagtabang kanako apan ang among panaghigala padayon lang sa gihapon.

Salamat nila nga mitabang ug mibulig. Mao nga ang bugtong balos nga mahimo nako mao man ang pagpaningkamot nga dili mamahimong pakyas ang bisan unsang hago ug bahandi nga ilang natampo pinaagi sa patinarong diha sa natad sa kinabuhi ug pangalagad nga akong gipili.

Kay ang pagpakabulay-og ingon man ang pagpahayahay samtang ang kinabag-an sa imong katawhan nagkalisudlisod ug wala gani kay gihimo bisan gamay aron lamang makatabang kanila, nan, nahimong pakyas ang kinabuhi alang kanimo ug kanila nga naningkamot aron maumol ka sa paagi nga mas makahuloganon.

Sa akong pag-adto sa Samboan akong nakita pagbalik ang pari nga migasto kanako kaniadto sa seminary. Hinuon dili tanan iyang giabaga ngari kanako apan giisip ko ang tanan nga usa ka dakong utang kabubut-on.

Mao nga kalipay ko nga makita ko siya pagbalik dili tungod aron mangayo kondili aron magpasalamat. Sama sa usa ka amahan nga mabalak-ong nangutana nga “Dong wa ka ba magkalisud?” ako siyang giingnan nga wala ra man padre! Mibathay ang pahiyom sa iyang mga mata samtang padayon siyang niawit sa mga alawiton ni Hadji Alejandro ug uban pang mga singers nga nahimong kabahin sa iyang kinabuhi ug sa nangligid nga mga katuigan sa iyang pagkapari.