Pwerteng aboga

Mga motorista nga miagi kagahapon sa Eme road sa Barangay Damolog, Sogod, gihakop sa tumang kakuyaw tungod kay halos dili makita ang karsada tungod sa pag-utbo sa abog gikan sa gikaykay sa ibabaw sa bungtod.

Gihisgotan nako kining mao nga isyu mga duha ka semana na ang milabay, ug giawhag nako ang kadagkoan sa Department of Environment and Natural Resources (DENR) ug Department of Public Works and Highways (DPWH) pagsusi niini.

Matud pa nga usa ka “slope protection” ang gihimo diha aron nga mapugngan ang pagpangligid sa mga bato gikan sa ibabaw. Kon mao pa kini ang gikahadlokan sa DPWH, nganong ang kontraktor nila wa man maghimo og mga pamaagi aron dili mameligro ang mga motorista nga mangagi sa karsada.

Si Kapitan Jovito Ladrazo sa Barangay Sapangdaku sa Cebu City misaysay sa iyang kasinatian kaniadtong Domingo nga abi gyud niya og madisgrasya na sila.

Dili na kuno makita ang karsada tungod sa grabeng abog nga mugna sa daghang anapog nga midailos gikan sa gibuldos nga bahin sa bukid didto sa ibabaw, ug mao nga napugos sila paghjunong ug naghuwat na lang kon unsay sunod nga panghitabo.

Siyaro na man pud ug ang kadagkoan sa DPWH 5th Engineering District dili gihapon mohatag og aksyon niining maong problema. Kamo diha sa DENR, unsa man wa gihapon mo’y gihimo niini? Kon wa pa mo’y gihimo nga aksyon, kanus-a man kamo mohimo’g lakang niini?

Maghuwat pa ba mo kon dunay madisgrasya usa mo molihok? Kamo nga kontraktor niining maong proyekto sa DPWH, kon tinuod man nga slope protection kini, nganong wa man kamo’y gihimong pamaagi aron dili mameligro ang mga motorista nga mangagi sa maong dapit?

* * *

Ang private water supplier sa Metro Cebu Water District (MCWD) nga nagkuha og tubig gikan sa Barangay Lusaran, Cebu City nabalaka nga magnihit na gyud unya ang tubig dinhi sa siyudad pipila ka adlaw gikan karon.

Sa tanang sapa dinhi sa siyudad, ang Lusaran River dili gayud mahubsan og tubig, apan mokunhod gyud ang iyang level. Kini maoy gikuhaan og tubig sa JE Hydro & Bio-Energy Corporation aron ilang i-process aron mahimong tubig nga mainom.

Matud ni Engr. Joffrey Hapitan nga maoy chairman sa JE Hydro nga nabalaka siya nga dili na makasuplay og daghang tubig kon moepekto na ang grabeng kainit sa panahon.

Hinoon, ang mga dapit sa dakbayan nga gisuplayan og tubig sa JE Hydro, dili gyud kahutdan og tubig kay mao kini ang “priority” sa kompaniya nga masuplayan og tubig.

Awhag ni Engr. Hapitan ngadto sa katawhan nga magdaginot gyud og tubig.