EDITORYAL - Special treatment?

Daghan kaayo ang mga mi-react bahin sa pagpiyansa ni Vice President Sara Duterte sa tulo ka kasong grave threats nga iyahang giatubang sa korte sa Quezon City niadtong miaging adlaw.

Gawas sa reaksyon nila bahin sa iyang seguridad nga iyang gipamahayag ngadto sa media, daghan ang nangutana kung nganong wala siya gipaubos sa proseso sama sa ubang mga dinakpang nag-atubang og kaso.

Naay mga namasangil nga naa daw special treatment sa iyaha kay wala man siya gipaagi og mugshots sama sa uban.

Tingali ang gustong makita sa mga tawo nga hulagway mao ang pagsul-ob og tangerine nga t-shirt sama sa nahitabo nilang Senador Jinggoy Estrada ug Senador Rodante Marcoleta nga ni-surrender ngadto sa kapolisan.

Una sa tanan, dili ni tungod kay si Duterte bise presidente sa nasud, kondili tungod sa gibug-aton sa kaso.

Silang Estrada ug Marcoleta nag-atubang og kasong graft kay ang pasangil kanila gikalambigitan og milyones ka pesos nga kwarta nga lapas sa gitakdang kantidad para pwede pang makapiyansa.

Samtang si VP Duterte, grave threats lang kini, krimen batok sa tawo nga ubos sa Revised Penal Code ug mahimo rang makapiyansa.

Gawas pa niana, wala motahan si Duterte ngadto sa kapolisan, nidiretso siya kauban sa iyang abogado ug mga security escorts sa korte diin giisyu ang warrant. Kun sa kapolisan siya nitahan, posibleng moagi siya sa giagian nilang Estrada ug Marcoleta. 

Pulong pa sa iyang abogado wala daw special treatment nga nahitabo ug dili daw matawag nga arestado kondili boluntaryong nitahan sa kaugalingon ang bise presidente.

Pero ingon ani man sab ang pamahayag sa mga abogado sa duha ka senador, boluntaryong nitahan apan para sa kapolisan arestado silang duha.

Hinuon posibleng naay nagpaluyong mga rason kun nganong naingon niini ang nahitabo sa proseso.

Puydeng isipon nga wala ipaubos sa susamang proseso si VP Duterte tungod sa iyang posisyon, o ba kaha para dili siya makabuhat og senaryo nga makadaut sa administrasyon.

Pareho silang tulo ni-surrender sa mga otoridad human nigawas ang ilang mga arrest warrants, pero unsa may kalainan nilang tulo, nganong si VP Duterte wala man pasul-oba og tangerine colored nga t-shirt nga naay nakasuwat nga detainee?