Nausik nga oportunidad sa katawhan

Dili lang diay mga school supplies ug mga libro ang wala mapang apod-apod sa lalawigan sa Sugbo, apil diay ang mga medical supplies.

Pastilan maka-pahugno tan-awon ang mga nakatiwangwang nga mga medical supplies nga anaa sulod sa Cebu International Convention Center CICC.

Naglakip kini gikan sa mga aparatus, hospital beds, injection, ug uban pa nga mga gamit sa tambalanan ug sa mga pasyente mismo.

Gikan sa mga donation ang naasoyng mga medical supplies diin 2016 pa kuno anaa sa CICC.

Matod sa kawani nga nag oversee sa naasoyng mga butang nga dihang miabot ang mga medical supplies miingon kuno kaniadto ang opisyal sa Provincial Health Office nga ila pang pilian ang mga butang sa sulod aron ipang apod apod sa mga tambalanan o magamit pa.

Apan wala naman gyud kuno balika hangtod nga gipang abogan og nahimo nang basura kay ang uban nga mga equipment nangakalabera naman ug kadtong mga gamit sa pasyente expired na.

Bisan og donated kini apan gipanag iya na kini sa probinsya nga gitumong unta alang sa katawhan.

Nausik ang tanan tungod sa klaro kaayo nga pagpasagad kon si kinsa ang nagdumala niini.

Unta kon napang apod apod kadto daghan ang nakapahimulos ug seguradong naay nangaluwas nga kinabuhi.

Samtang gawas sa mga donated nga medical supplies, naa pa usay na procure sa provincial government nga mga medical kit niadto pang 2017 apan natanggong gihapon sa CICC kauban ang mga school supplies.

Hinuon magamit pa man kini kon maapod apod lang. Anugon dili lang ang resources sa kagamhanan kon dili ang oportunidad sa mga kabus nga Sugboanon nga makapahimulos sa naasoyng mga butang nga libre.

Maayo unta mapanubag kon si kinsa ang nagpasagad nganong nahitabo kini.