EDITORYAL - Pagka-anugon sa pundo

Pagkaanugon sa 178 ka sakong NFA rice nga gitagana pa sa dinaliang pagkaon sa mga tawo kung dunay kalamidad, tungod kay giagup-op nalang , nagtibugol ug nilagom wala na gyud mapusli maong gilabay nalang.

Mao ni ang nahitabo sa stockpile nga bugas sa bodega sa lungsod sa Bantayan nga gitagana para unta sa dinaliang tabang sa lungsod sa ilang mga moluyo nga maigo og kalamidad.

Matud pa sa pangulo sa Bantayan Municipal Disaster Risk Reduction and Management, kaning mga bugasa, parte ni sa 350 ka sakong NFA rice nga gipalit sa niaging administrasyon para sa katawhan.

Naabtan na daw ni og usa ka tuig sa bodega maong nadaut na ug dili na makaon para sa tawo.  Dili kalikayan nga nakapangutana ang mga tawo kung nganong nahitabo man kini.

Dili ba nakahibalo man gyud ang tanan nga naay expiry date ang mga pagkaon, sama aning bugas? Nganong wala man kini gidispatsar nalang daaan panagana nga dili mausik ang kwartang gipang-palit ani?

Nasobrahan ba kahigpit ang atong balaod mahitungod sa gipanggamitan sa kwarta sa katawhan?

Kay hasta ang dinaliang tabang sama sa pagkaon para sa panahon sa emerhensiya kinahanglan pang moagi og makuting pagsusi kun makaon pa ba o dili.

 Kay ultimo ang pagtino sa bugas kun makaon pa o dili, molanat pa man og pipila ka bulan ayha mogawas ang resulta o tubag sa simpleng pangutana.

Tungod sa kadugay sa tubag gikan sa mga “eksperto” , ang imbes unta puyde pa makaon nga pagkaon maabtan nalang og pagkapan-os, di na gyud hinuon mapuslan.

Mas giuna pa nila ang proseso nungka sa posibilidad nga mausik lamang ang pagkaon.

Tingali maayong usbon sa mga hingtungdang ahensiya sa gobiyerno ang pamaagi o sistema nila bahin aning mga pre-positioned emergency food packs ug emergency food stocks sa tanang mga bodega sa gobiyerno.

Daghang mga kaigsuonan nato nga gipanggutom kay lugos kapalit og bugas ug pagkaon, unya naay daghang stocks sa mga nagkadaiyang bodega sa gobiyerno nga gitan-ugan lang hangtud madaut.