Diha sa kahilom

Daghan ning panahon nato karon ang buot og kisaw ug pagtagad. Mao nga diyotay nga kasaulogan patawag dayon og press con.

Hinuon, paagi kini sa pagsibya sa produkto ug idelohiya sa pamasin nga maoy hangpon sa kinabag-an bisan pa man kun kini pinugos. 

Ang uban nga nibati og tumang kalaay sa kinabuhing pinasikad sa naandan ang mosunod ingon nga kabayo nga mag-agad sa lapdos sa kutsero.

Apan sa laing bahin, dili tanang panghitabo nagkinahanglan og pakpak ug pagdason sa kinabag-an.

Ang yanong paghigop og kape uban sa imong hinigugma tulukibon uyamot nga kasinatian sa paghinatagay og bili sa usa’g usa.

Ang pagsuroy sa malls ning atong dakbayan ingon man ang paghimo og window shopping kay way kwarta mahinungdanong outlet man sa stressful nga kinabuhi.

Ang pagsing-al bisan pa man kun nguhal ang tingog sa pagkanta diha sa videoke kasaulogan man sa kinabuhi.

Dili naman tingali nga himuon nimo ang pagkanta ingon nga sing-al sa pasiatab kondili pagsaulog sa kinabuhi diha sa kahilom sa imong kaugalingon luna.

Mas maayo nga dili kaayo igkita ang imong bayhon diha sa kabuntagon ug kahaponon sa imong kinabuhi. Kay bisan pa man og unsaon, ang mga tawo kun ikaw mapuslan kanimo mogamit sa hilabihan ug mahimong ikaw bayawon tungod ug alang sa gitawag nilang misyon aron sa mga gamhanan ikaw mapahimuslan.

Kun motugot ka nga mahitabo kini kanimo, imo man kanang desisyon.

Ug sa pagdesisyon nimo niini nibuot ka nga mamahimong kabahin sa kutay sa sistemang magamiton kuyog sa mga tawong gigamit, nagpagamit, ug mogamit.

 Ang pagtulon-an mao: “Diha sa paghimo og maayo, wala na kinahanglana ang pagsibya niini kay basin daghan ang mosawsaw sa imong inantigong tampo aron mamahimong lingaw ang kalibutang latagaw!”