Pirmahay alang sa kalinaw

Adunay ipahigayon karong adlawa nga pirmahay sa kasabotan alang sa usa ka malinawon, hapsay ug limpiyo nga bugnong lugaynon karong Mayo.

Tungod niini, nanawagan ang Commission on Elections niadtong mga kandidato sa pag-participate sa maong kalihokan.

Nakab-ot ang ideya pagpahigayon og peace covenant atol sa Cebu City Joint Security Meeting.

Gawas sa mga opisyal sa Comelec, apil sa mosalmot sa maong kalihokan ang kapolisan ug mga lider sa mga religious groups.

Maayo kini nga lakang sa Comelec, kapolisan ug simbahan. Angay lamang nga mosaad ang atong mga kandidato alang sa malinawon ug walay trampas nga eleksiyon.

Kini aron nga kredible kini ug daygon sa katawhan.

Hinuon dili lang ang dakbayan sa Sugbo ang mopahigayon og peace covenant alang sa mga kandidato.

Adunay pipila ka local government units sa lalawigan sa Sugbo ang nakapahigayon na niini sama sa dakbayan sa Mandaue ug lungsod sa Barili.

Maayo kining mga peace covenant matag piniliay. Alang niadtong mga kandidato kinsa mosalmot niini, nagpakita kini sa ilang paghandom alang sa usa ka malampuson nga piniliay nga walay bahid sa dugo.

Anaa gayud sa mga kamot sa mga pulitiko nakataya ang usa ka hapsay ug matinud-anon nga bugnong lugaynon.

Basta dili lamang mokapyot ang mga kandidato sa bayolente nga pamaagi, wala rason nga dili malinawon ang eleksiyon.

Ug hinaut nga dili lamang kutob sa pirmahay ang atong mga kandidato.

Hinaut nga ila usab nga tamdan ang ilang mga saad sa dili pagliko ngadto sa bayolente nga paagi aron lamang nga masongkit ang posisyon.

Daghan nang hitabo nga adunay mga covenant signing apan sa katapusan, naputos gihapon sa dugo ang piniliay gumikan lagi niining pipila kinsa mga hakog sa gahum nga buhaton gayud ang tanan aron nga modaug.   

Basin baya kun maayo lamang mo-starring sa camera kining atong mga kandidato.

Basin baya nga sa ilalum sa ilang ngisi ug komustahay human sa pirmahay alang sa kalinaw sa umaabot nga piniliay, nag-umido diay ang dautang intensiyon pagsakmit sa gahum.