Bagal sa itlog ang ngipon mohimsog (1)

Mao nay atong naandan, nga kon mogamit kita og itlog aron lutoon o kuhaan sa  pughak (puti) ug oyok (yellow), ang bagal niini ato lang idispatsar o ilabay sa sudlanan og basura.

Dili usab kita makabasol sa kaugalingon, kay wala man ta masayud kon unsa ka kabililhon sa bagal sa itlog (eggshell), ang mahatag nga benepisyo sa panglawas, sama sa pag-ayo ug paglig-on sa atong ngipon.

Ang bagal sa itlog, sama sa atong ngipon, nagbaton og susama nga komposisyon sa minerales — Sodium, magnesium, sulfur, phosphorus, potassium, iron, silicone ug aluminum. Sa ato pa, dili kaugpo nga masanta sa bagal ang ‘cavities’  o ‘tooth decay’ nga mokutkot  sa sustansyadong               ngipon.

Dugang ini, ang bagal sa itlog nagbaton pa gyud kini og mga ‘amino acids ‘, sama sa ‘cysteine’, ‘menthionine’ ug ‘lysine’, aron mabuni ang kinutkotan sa ngipon hangtud matibuok pagbalik nga mohimsog ang ngipon, nga lisud na madutlan sa kalig-on ini nga gihapinan sa natural nga proteksyon (tooth enamel).

Unsaon  may buhaton ini ? — Magpabukal og tubig, dayon ilunod ang tinigum nga hinugasang mga bagal sa itlog.  Human sa singko minutos, igo na kini mopatay sa mga kagaw ini, unya kuhai sa tubig ug paugha.  Ighuman ipagaling o pulbosa o kaha i-blender kini nga mapino og maayo. Isulod kini sa garapon nga tinakoban.

Kada adlaw, mokonsumo ka ini og ½ ka kutsarita sa pinulbos nga bagal.  Mahimo ni nga isagol sa mga pagkaong paborito mo, smoothies, gatas, kape ug uban pa. Ayaw lang nianang mahilig sa pagkahinam-ison kay makadaut sab kini nga hilison ang proteksyon sa ngipon.

Ngano ug sa unsa man nga paagiha — ang bagal sa itlog susama ra sa ngipon? Ang tukmang tubag - wala ni kalainan nga pulos adunay duha ka epekto. (Sumpayan)