EDITORYAL - Pinatyanay na g’yud
Nabantayan karon nga mipaspas pag-ayo ang kampanya sa kagamhanan batok sa mga tawo nga responsable sa pagpamaligya og gidiling drugas. Didto lang sa Bulacan, 24 ka suspetsadong pusher ang napatay sulod lang sa siyam ka oras. Dinhi usab sa Sugbo, wala magpalupig ang kapolisan ug mga sakop sa Philippine Drug Enforcement Agency (PDEA) kay daghan sab sila og mga napatay nga kuno misukol kay dili gusto nga magpadakop nga buhi.
Tukma ang gihimo sa mga tinugyanan sa balaod, kay alang-alang man og magpatara lang sila ug magpapatay sa mga armadong drug pusher. Sama niadtong polis nga si PO3 Ryan Martus Quiamco, nga apil sa gibulgar ni Presidente Duterte nga nalambigit sa negosyo sa ilegal nga drugas, napatay kini kaniadtong miaging gabii kay misukol sa mga polis. Dili malalis nga desidido g’yud kadto si PO3 Quiamco nga mopatay kon siya dakpon.
Human mapatay sa kapolisan si PO3 Quiamco, laing duha ka suspetsadong pushers ang napatay na usab sa kapolisan didto sa dakbayan sa Naga, ug duna pa’y lain sa dakbayan sa Talisay. Sigurado nga kadtong supak g’yud sa pagkuyanap sa gidiling drugas, malipay nga ang mga drug pushers anam-anam nga mangamatay. Tinuyoan kini sa maong mga tawo kay nasayod na sila nga hugtanay na karon ang kampanya ni Presidente Duterte batok drugas, apan wala sila mangundang.
Pagka karon, angay’ng mag-inabtik na g’yud ang kapolisan, ilabi na ang mga sakop sa PDEA, sa paghimo’g kampanya batok sa mga drug pushers. Daghan pa kaayong drug pushers nga wala mahadlok sa bahad ni Presidente Duterte nga sila hiposon kon magpadayon sa ilang mga daotang binuhatan.
Dili sila angay’ng mahadlok nga mopatay sa mga drug pushers kon kini mosukol kanila kay anaa sa ilang likud ang presidente nga andam molaban.
- Latest