Ang hagawhaw sa kamingaw

Wala’y tawo nga wa makasinati og kamingaw. Gani usahay, bisa’g unsa kaalegre sa palibot, mao gyu’y mopatigbabaw ang hagawhaw sa makabungog nga kamingaw. Kay may naghasol sa panumdoman nga nakatay-og pag-ayo sa gihambing nga  kasagmuyo. Ingon sa ihunlak ang kadasig sa kaugalingon.

Kalagmitan kun magpadaug kita nga way gihimo nga batokan kini’ng mao’ng sitwasyon, makapaapektar kini sa kahimsog sa atong panglawas. Kinahanglan nga lingawon ang kaugalingon sa paagi nga dili mo ipukos sa mga negatibong panghunahuna. Ayaw itugot nga inutilon ka.

Kay luyahon ka man ini’ng di na ganahan sa unsa may buot mo’ng buhaton sa kinabuhi. Matigaw ang mga nakahan-ay mong mga plano nga hasulon ka sa kalibog, nga gihulhog sa grabe’ng kamingaw. Itakli sa buhat nga kanunay ka’ng pisikal nga naglihok, aron kalimtan sa makadiyot ang hinungdan sa kamingaw.

Ang grabe’ng kamingaw, nga musangpot sa ‘mental stress’ o depresyon, mas kuyaw pa kini sa kanser, kun ang pangutok na’y madaut. Mayabag nga wa na’y husto’ng kabuot. Busa sa sitwasyon nga ingon ini, ayaw pasagdi nga way remedyo nga buhaton aron kapugngan ang di lang kini makabungog kundi mobungkag gayud sa pagkatawo nga mawad-an na’g paglaum nga mabuhi.

Anaa ra kanato ang sulbad sa kamingaw. Dagha’g paagi kini’ng mahimo sama pananglitan nga makighinabi’g magkumustahay sa mga suod nga higala, o kaha makighigala nga suoron. Moapil sa mga pundok o sa mga katilingbano’ng kalihokan. Iabag ang kaugalingon alang sa kahiusahan sa mga kaugmaran.

Mopadasig sa buhat sa kalooy. Mobasa’g mutan-aw og mga makalingaw aron mainspirado. Muadto sa gym, moapil nga kauban sa mga nag-ehersisyo. Mag-window shopping o maglakawlakaw sa palibot, nga sa mga tawo makigsandurot.