Pagbuntog sa uwan
- Leo Lastimosa (Banat) - January 29, 2016 - 9:00am

Kalit ang pagkausab sa kahimtang sa panahon, gikan sa way hunong nga uwan ngadto sa suwaw ug naglingiting nga kainit sa adlaw, nga dihang gipahibawo sa mga tigpasiugda sa 51st International Eucharistic Congress (IEC) nga mahinayon ang panapos nga misa sa South Road Properties (SRP) wa nay bisan usa nga nikuwestiyon.

Kun naumol ang hukom samtang nagbunok pang uwan, daghan gyod untang motiyabaw. Dihang among gipangutana ang mga tigpaminaw sa Arangkada sa DYAB Abante Pa, Bisaya! niadtong Huwebes sa buntag, pila lang ka oras sa wa pa mopakita ang adlaw, abunda ang sugyot sa alternatibong venues: Cebu City Sports Center, Plaza Independencia, Mactan-Cebu International Airport ug daghan pang uban.

* * *

Natinuod ang forecast ni Direktor Oscar Tabada sa Philippine Atmospheric, Geophysical and Astronomical Services Administration (PAGASA) sa Visayas nga init na sa Huwebes sa hapon ug sa tibuok Biyernes. Hinaot nga matinuod sang iyang pangagpas nga way uwan karong adlawa, Sabado.

Bugtong nausab sa forecast ni Tabada, ug makalipay ni sa mga delegado ug sa mga manimbahay sa Statio Orbis, ang Santos nga Misa nga pormal nga motapos sa IEC, mao nga ang uwan karong Domingo kutob ra sa udto, mopakita na pagbalik ang adlaw sa hapon dayong pahigayon sa kalibotanong misa sa templete ni San Pedro Calungsod sa SRP.

* * *

Labihang dakoa sa kausaban sa panahon nga nausab na sang panugon sa mga nag-andam sa 27 ka ektarya nga luna sa SRP. Gawas nga paandamon gihapon og mga kapote (kay di man makadaot ang pangandam kun simbako mag-uwan gyud), gipaandam na sang kapin sa milyon ka manimbahay og binotelyang tubig kay gipangagpas nga init pa kaayo sa pagsugod sa misa sa alas-4 sa hapon.

Masaligon si Cebu City Councilor Dave Tumulak, pangu sa City Disaster Risk Reduction and Management Office, nga ang di mahurot og suyop sa ilang mga makina nga lim-aw sa SRP mauga tungod sa labihang kainit. Ipakatap sab hinuong mga trak sa bombero (aron makapanghimasa ang mga manimbahay kun simbako magbaha og balik).

* * *

Gipangagpas nga mas daghang manimba sa misa karong Domingo kay sa nasudnong thanksgiving mass sa canonization ni San Pedro Calungsod niadtong 2012 kay gikanselar ang tanang misa sugod sa ala-1 sa hapon karong Domingo, mahimong mao ra ni IEC nga atong masaksihan ning kinabuhia ug mopadangat pa gyod og mensahe si Pope Francis.

Makapatandog ang mensahe sa Santo Papa, segun ni Monsenyor Joseph Tan, tigpamaba sa Artsidyosesis sa Sugbo, nga nakalili sa video sa mensahe. Bisan di mahinayon ang orihinal nga plano nga live ang mensahe ni Pope Francis tungod sa managlahing oras sa Sugbo ug Roma, daghan gihapong naghinam-hinam nga maminaw sa pagtimbaya ni Pope Francis sa Sugbo ug mga Sugbuanon.  leo_lastimosa@abs-cbn.com

ABANTE PA ANG CEBU CITY COUNCILOR DAVE TUMULAK CEBU CITY SPORTS CENTER CITY DISASTER RISK REDUCTION AND MANAGEMENT OFFICE DOMINGO MGA NGA POPE FRANCIS SAN PEDRO CALUNGSOD SUGBO
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with