Ayaw lansangi si Lollipop

Migawas sa laing pamantalaan ang isyu kabahin sa duha ka sakop sa Liberal Party sa siksto distrito nga buot magpapili pagka-mayor sa siyudad sa Mandaue human sila si Bokal Thadeo Ouano ug anak niining si Konsehal Lollipop Ouano-Dizon miadto sa buhatan ni Gobernador Junjun Davide.

Apan ang tinuod diay si Lollipop maoy nangumusta kang Davide unsa’y iyang desisyon tali kaniya ug ni Kongresista Luigi Quisumbing.

Si Quisumbing may lain pa’ng termino pagka-kongresista pero ambot ngano nga ganahan g’yud siya nga mag-mayor sa Mandaue nga klaro man siya’ng dehado kang Lollipop.

Sa mantalaan, si Junjun miingon nga ang plano nga si Luigi maoy i-mayor sa Mandaue ug si Mayor Jonas Cortes nga anaa na sa katapusang termino maoy mag-kongresista.

Unya giingon didto sa balita nga si Lollipop misulti nga bisan unsa’y mahitabo, mosuporta gihapon siya ni Junjun ug ni Agnes Magpale.

Kasaligang tinubdan nagkanayon nga tuis kaayo ang balita kay wala man diay magsulti si Lollipop kang Junjun nga pananglit unsa’y desisyon, mosuporta gihapon siya kaniya ug ni Magpale.

Ang tinuod diay nga respetohan ra sa mga Ouano ang desisyon ni Davide, apan mangita sila og laing “option,” tingali modawat sa imbitasyon sa laing partido.

Maayo tingali nga magklaro na si Davide kinsa g’yuy iyang suportahan diha sa Mandaue aron dili siya maakusahan nga “manglansang” og mga kandidato nga mga higala ug andam mosuporta ni Mar Roxas sa 2016.

Ang na-display sa mga tawo mao ang pagkabuotan ni Junjun, apan kun buotan siya nga wala’y klaro, dili na g’yud na maayo. Ayaw sakyi ang kakusog ni Lollipop sa Mandaue, hinuon gamita kini sa tinarong nga pagdesisyon kun okay ba siya sa LP o dili ba.

Kun tuyo ni Davide nga iya lang lansangan si Lollipop aron dili makatapon og laing partido, minaldito kini, ug sukwahi na sa iyang pagkabuotan. Dili kini makatabang pagpadaog sa manok sa LP nga si Mar.

Si Mar mi-number one na ra ba sa survey nga gipasiugdahan sa usa ka mantalaan sa kaulohan.

Giulan og mga pagsaway sa pikas kampo ang survey. Dili na kahibudngan kay nag-una man si Mar unya gidan-okan ang bise presidente nga si Jejomar Binay nga tua na sa kinaiwitan.

Mao ni akong nalibgan, kaniadto nga nag-una si Binay, dayeg kaayo sila sa survey. Karon nga si Mar na ang nag-una, saway na sila.

Si Grace Poe usab gibuhian na sa LP. Nakaklaro na tingali ang LP nga nagpadala g’yud sa sulsol ni Chiz Escudero si Grace. Bisan nasayod kining wala pa siya’y kasinatian sa panggobiyerno, mipugos g’yud.

Apan dili na makamahay ang Nationalist People’s Coalition kun mapilde si Grace unya dili na makasulod sa coalition government. Wala sila’y laing tuk-on, si Chiz ra g’yud.