Epekto sa druga

Dako ug grabe gayud og epekto ang druga. Kini nga klase sa bisyo mosangpot gayud usahay sa ngilngig nga panghitabo. Sama na lamang sa masaker didto sa lungsod sa Catmon sa niagi nga mga adlaw.

Ang iya’ng pagkalango sa druga maoy hinungdan ngano nga gipatay ni Eric Figues ang iya’ng tulo ka anak ug ugangan nga babaye. Mismo ang asawa ni Eric nga si Jumelyn ang mibutyag nga tiggamitan og druga ang iya’ng     bana.

Kahinumdoman nga gidunggab patay ni Eric ang iya’ng mga anak nga si Stephanne, John Eric, Erica Lynn ug mother-in-law nga si Emilda atol sa selebrasyon sa adlaw nga natawhan ni Stephanne sulod sa ila’ng balay. Human niini, iya usab nga gikutlo ang iya’ng kinabuhi.

Sa wala pa kini mahitabo, daan nang adunay dili maayo nga relasyon ang magtiayon. Sige kuno nga pasanginlan ni Eric si Jumelyn nga adunay lalaki, butang nga gihimakak sa asawa. Siguro druga ang nagsugnod sa bana pagpangabubho sa iya’ng asawa.     

Ang iya’ng pagkagumon sa druga maoy gitan-aw sa usa ka eksperto nga hinungdan sa pagka-paranoia ni Eric. Matud pa ni Doctor Rene Obra sa Vicente Sotto Memorial Medical Center nga mao kini ang hinungdan sa pagpatay ni Eric sa iya’ng mga anak ug ugangan.

Matud ni Obra nga tungod sa sige’ng gamit og druga, posible nga naka-experience og hallucinations si Eric ug nga nakadungog kini og mga tingog pagtukmod kaniya pagbuhat sa mao nga krimen.

Klaro nga giplano nang daan ni Eric ang pagmasaker sa iya’ng pamilya gumikan sa suicide letter nga na-recover sa otoridad. Hinuon ang dako niya nga pagbasol tungod sa iya’ng nahimo mao usab ang nagdani ni Eric sa iya’ng pagpakamatay.

Hinaut nga ang insidente magsilbi nga leksiyon alang niadto’ng mga nagumon karon sa gidili nga druga, nga wala gayud kini maayo nga epekto.

Tungod kay giigo na man sa druga ang utok sa usa ka drug addict, wala na kini klaro’ng paminsar kundili ang pagbuhat og dili maayo.

Sa ka alarming sa mao’ng panghitabo, mas angay nga pakusgan pa sa otoridad ang kampanya batok sa ilegal nga druga karon. Kaya kini nga matuman, ilabina kun motabang usab ang komunidad.