_banat
^

Banat Kalingawan

Gugma sa kaaway

Sugilanon - Dodong Espanol - Banat

Problemado ang managtiayong Dante ug Alma sa ilang anak nga si Rose. Graduwado siya’g BS Psychology apan makaingon sila nga wa siya’y nakat-onan sa iyang kurso. Ang psychology usa ka pagtuon sa batasan o panlihoklihok sa tawo. Si Rose mismo wa maka-istudyo sa iyang kaugalingong batasan.

“Minyo na siya duha nay anak apan daga gihapon ang panlihoklihok,” ni Dante usa ka Domingo sa buntag nga sila rang duhang managtiayon ang nahibilin sa balay. Si Rose ug iyang bana nga si Jake ug mga anak nanuroy sa mall.

“Grabe si Rose makagasto sa panghindik. Wa nay mahibiling  kuwarta para sa iyang mga anak,” ni Alma. Nitupad og lingkod ni Dante sa sopa sa ilang sala.

“Unya, kun magtiyabaw ang anak kay dunay gipangayo, di kamaong mo-am-am si Rose. Singkahan lang ang bata. Unya dapatan dayon. Way child psychology!” ni Dante. Nangukay og magazine ilawom sa lamesita.

“Pareho lang sa iyang bana nga gastador sab kaayo sa iyang paporma,” ni Alma. Gitarong niya ang kuwelyo sa t-shirt sa kapikas. “Dagko man kaayo sila’g gasto sa facebook, pakita sa ilang mga higala sa ilang kaguwapo ug kaseksi,”  ni Dante. Nipakli sa magazine sa mga interior designers.

“Nagsalig raman gud sila nato. Wa sila’y gasto sa puy-anan, kay ipon ra man sila nato. Libre man sila tanan, abang sa balay, gastohan sa tubig, telepono ug kuryente. Ang ilang dagkong suweldo gikan sa Call Center, ila ra. Di gani sila katampo sa pagkaon kunsomo nato. Ultimong tambal, diaper ug sustansiya sa mga bata, kita pay kapalit. Kay maluoy man ta’s atong mga apo!” ni Alma. Nanghupaw.

“Kay attached man kaayo ta’s atong mga apo, giabusohan nila atong pagpangga sa mga apo nato,” ni Dante. Nangagho.

Usa ka CPA si Dante. Sa iyang kita makabuhi gyud hinuon og dakong pamilya. Duha ray ilang anak. Ilang kinamaguwangan si Rose. Ilang kinamanghuran nga si Daisy, daga pa. Apan mas dako pa’g suweldo ni Rose. Interior designer si Daisy ug maoy matinabangon sa ginikanan. Sukwahi sa kinaiya ni Rose.

“Maayo pa makig-meeting hinuon ta nilang Rose ug Jake, mahitungod sa ilang kapritso nga wa nato mauyoni,” ni Dante.

“Ayaw na lang gyud. Kay kita ray molutaw nga dautan,” ni Alma.

“Kun wa tay buhaton sa pagsulbad sa problema, magpabilin gyud nga naa ang problema!” ni Dante.

“Way laing solusyon,” ni Alma.

“Unsa man?” ni Dante.

“Agwantahon,” ni Alma.

“Kana kun maagwanta,” ni Dante.

“Nganong dili? Si Jesucristo nag-ingon:  Higugmaa imong kaaway. Ngano man?” ni Alma.

“Ngano man tuod?” ni Dante.

“Kay usahay ang imong kaaway naa ra’s imong panimalay. Usahay, imo rang anak ug umagad imong kaaway,” ni Alma. Nakayangoyango si Dante. Nihinuktok og dugay. Unya nipunit sa remote control sa TV. Mamili na lang siya’g salida. Si Alma nitindog aron magdigamo sa paniudto. (Kataposan)

 

ALMA DANTE ILANG MAN ROSE SI ROSE SILA
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with