9 ka babaye na-rescue

CEBU, Philippines — Siyam ka babaye, lakip ang usa ka 15-anyos nga dalagita, ang giluwas sa kapolisan gikan sa usa ka condominium unit sa Barangay Kamputhaw, Dakbayan sa Sugbo, human sila giingong gipriso sa us aka Amerikano niadtong Miyerkules sa buntag, Oktubre 14.

Gidakop atol sa operasyon ang 59-anyos nga Amerikanong si alyas nga “Jonathan,” usa ka retiradong investor nga taga-Missouri, United States, nga nag-abang sa maong condo unit sa Juana Osmeña Extension.

Nagsugod ang insidente human mireklamo sa Inayawan Police Station 7 ang inahan sa 15-anyos nga dalagita tungod sa pagkawala sa iyang anak ug nangayo og tabang aron kini makit-an.

Matud pa nga nakatug-an ang dalagita nga anaa siya sa condo kauban ang walo pa ka babaye.

Giingong wala sila tugoti sa maong langyaw nga mogawas sa unit ug gisigehan sila og lugos sa maong suspek.

Human makadawat sa report, nakig-alayon ang mga personnel sa Inayawan Police Station 7 sa Abellana Police Station 2 ug sa Women and Children Protection Desk (WCPD) alang sa rescue operation.

Miadto ang mga pulis sa condo ug gipugos og abli ang pultahan aron makasulod. Didto nila giluwas ang siyam ka babaye ug gidakop si Jonathan.

Sa pagsusi sa mga pulis sa condo unit, nakarekober sila og pakete sa gituohang shabu o methamphetamine, sumala sa report.

Gitugyan ang mga babaye ngadto sa Department of Social Welfare and Development (DSWD) ug sa mga medical personnel sa kapolisan aron mahatagan og tukmang tabang, lakip ang psychological intervention ug trauma debriefing.

Nakig-alayon usab ang mga awtoridad sa ilang mga katugbang sa Estados Unidos aron susihon kun aduna bay nangaging criminal record o outstanding warrant si Jonathan didto.

Gipabilin si Jonathan sa kustodiya sa Abellana Police Station samtang giandam o giproseso ang mga reklamo batok kaniya, lakip ang giingong illegal detention, rape, human trafficking ug posibleng paglapas sa Republic Act 9165 o Comprehensive Dangerous Drugs Act of 2002.—  IBM BANAT NEWS