DOJ nangusog batok human trafficking

CEBU, Philippines — Gipangusgan sa Department of Justice (DOJ) ang kampanya batok sa human trafficking pinaagi sa mas lig-on nga kooperasyon sa ubang nasud, padayong operasyon sa mga otoridad ug pag-apil sa komunidad human maluwas ang usa ka menor de edad sa Cebu nga nalambigit ang usa ka langyaw.

Gikumpirma ni DOJ Secretary Fredderick A. Vida ang maong rescue atol sa iyang pagbisita sa Cebu niadtong Miyerkules, Oktubre 14.

“We have active operations, we also have active engagement with networks,” matud ni Vida, kinsa mipasiugda nga padayon ang paningkamot sa gobyerno sa pag-ila, pag-imbestigar ug pagpasaka og kaso batok sa mga nalambigit sa pagpamaligya ug pagpahimulos sa mga biktima.

Mianhi si Vida sa Cebu aron motambong sa regional summit sa Inter-Agency Council Against Trafficking (IACAT), diin magtinabangay ang mga komite gikan sa mga nasod nga sakop sa Association of Southeast Asian Nations (ASEAN) sa pagpaambit sa impormasyon ug mga pamaagi sa pagbatok sa human trafficking. Matud sa kalihim, importante ang internasyonal nga kooperasyon tungod kay ang mga naghimo sa krimen mahimong anaa sa laing nasod samtang ang ilang mga biktima anaa sa Pilipinas, o kaha baliktad ang sitwasyon.

“There are certain gaps in the system. Why? Because it becomes an international concern,” matud niya.

Pinaagi sa mas lig-on nga koordinasyon sa mga kauban sa ASEAN, gilauman sa DOJ nga mapauswag ang mga lakang sa pagpugong sa human trafficking ug ang pagtubag sa mga kaso nga naglambigit sa daghang nasod.

Gipasabot ni Vida nga usa sa dagkong hagit sa kampanya mao ang pagpugong sa human trafficking sa dili pa kini mahitabo. Lakip usab sa ilang mga prayoridad ang pag-ila sa mga suspek, pag-imbestigar sa mga kaso ug pagpasaka og kaso batok sa mga responsable.

“The challenge is preventing,” matud niya, samtang gipasiugda ang panginahanglan nga dili mohunong ang mga otoridad sa ilang mga operasyon.

Matud pa sa kalihim, dili matapos sa rescue ang responsibilidad sa gobyerno, ilabina kun menor de edad ang biktima,  kinahanglang matabangan sila nga makabalik sa komunidad ug makapadayon sa normal nga kinabuhi. “What we want is to reintegrate back the child victim into their society and to the community,” matod ni Vida.

Giawhag usab ni Vida ang publiko, ilabina ang mga barangay ug mga silingan, nga motabang sa pag-ila ug pagreport sa posibleng mga kaso sa human trafficking.

Matod niya, usa sa mga problema sa pagbatok niini mao ang underreporting o ang kakulang sa mga taho, nga posibleng hinungdan nga magpadayon ang pagpahimulos sa mga biktima nga wala mahibaloi sa mga otoridad.

“That's why we need the help of the entire community. We need the help of the barangays. We need the help of the neighbors to report to us,” matud niya.

Gihulagway usab ni Vida ang Cebu isip ehemplo sa maayong koordinasyon tali sa nasudnong ahensiya ug lokal nga pangagamhanan.

Nibisita sad siya sa opisina ni Cebu Gov. Pamela Baricuatro niadtong Miyerkules aron hisgotan ang pagpalig-on sa ilang kooperasyon.

“It's a continuous fight. Hindi kasi tayo pwedeng magpahinga dito. We cannot rest,” matud ni Vida, kinsa mipasiugda nga kinahanglan magpadayon ang panaghiusa sa mga otoridad ug komunidad aron mapanalipdan ang mga tawo nga bulnerable sa pagpahimulos. – IBM BANAT NEWS