Karambola sa SRP viaduct

CEBU, Philippines — Patay ang usa ka 24-anyos nga babaye human naligsan sa usa ka Mitsubishi truck nga giingong nikagar ang brakes diha sa SRP viaduct Cebu City, alas 2:45 sa hapon niadtong Septiyembre 27, 2026.

Ang namatay mao si Helvic Joy Guyong Dalanon, 24, residente sa Lapu-Lapu City ug drayber sa gray nga Honda Beat 110. Gideklarar siya nga patay sa responding ambulance personnel diha mismo sa lugar sa insidente.

Naangol usab si Jovelyn Cuyos Abellanosa, 28, ug ang iyang angkas nga si Bridgeth A. Melencion, 28, residente sa Kinasang-an, Pardo, Cebu City.

Gidala sila sa Chung Hua Hospital sa Mandaue City alang sa medikal nga pag-atiman.

Base sa inisyal nga imbestigasyon sa Traffic Enforcement Unit (TEU) sa Cebu City Police Office, nagbiyahe sa samang direksiyon ang tanang nalambigit sa insidente.

Ang mga sakyanan nila Dalanon, Abellanosa, Nilo Lumaad Angcahan, 49, Ederwin Jr. Cuadra Briones, 30, ug Roberto V. Cending, 38, mihunong sa outer lane tungod sa grabe nga trapiko.

Samtang, nagbiyahe sa inner lane dapit sa center island si Romel Nanet Genodiala, 46, nga nagmaneho sa Mitsubishi truck. Giingong nakamatikod si Genodiala nga nikagar ang iyang brakes. Aron malikayan ang pagbangga sa mga sakyanan sa iyang atubangan, iyang gimaniobra kini paingon sa tuo nga bahin sa dalan.

Apan naigo niini ang motorsiklo ni Dalanon ug naligsan ang maong drayber. Human niini, nahitabo ang sunod-sunod nga pagbangga nga naapil ang ubang mga sakyanan sa maong lane.

Nalabay ang motorsiklo ni Dalanon ug naigo ang Suzuki minivan nga gimaneho ni Briones. Ang minivan misunod usab sa pagbangga sa forward wingvan ni Cending.

Naapil usab sa insidente ang motorsiklo ni Abellanosa ug ang Honda XRM nga gimaneho ni Angcahan. Gipaubos si Genodiala og alcohol breath analyzer ug negatibo ang resulta. Gidala sa TEU ang mga nalambigit sa insidente alang sa dugang nga imbestigasyon. – IBM BANAT NEWS